Minister Oduber: “Aruba su turismo ta na caminda pa un aña record. Tur indicador ta mustra esaki, e cifranan no ta gaña”

A traves di diferente estadistica y comunicado di prensa, Minister di Turismo y Salud Publico, Dangui Oduber, a indica cu e recuperacion di turismo di Aruba ta na caminda pa un aña record, pa loke ta trata cifranan di turismo, den comparacion cu aña 2019, cu anteriormente tabata e miho aña pa turismo den e historia di Aruba.

Ariba su pagina di Facebook oficial, Minister Oduber, a señala cu el a tuma nota recientemente di un articulo cu lider di fraccion di AVP, Mike Eman, a skirbi den cual Eman ta referi na e reduccion di capacidad di KLM pa Aruba como un señal preocupante.

Ademas Eman ta señala den su articulo cu Gobeirno di Aruba no a haci estudio pa wak si, a pesar cu aumenta prijs, turistanan lo sigui bishita e isla y cu e isla ta “deteriorando” y no tin mantencion ta tumando luga.

Minister Oduber, a traves di e mesun publicacion ariba su red social, a aclaria e puntonan cu Eman a trece pa dilanti, cu segun Minister Oduber “no ta cuadra cu realidad”.

“E realidad ta cu Aruba su turismo ta na caminda pa un aña record. Tur indicador ta mustra esaki, e cifranan no ta gaña. Di januari te cu juni tur luna Aruba tabata tin un recuperacion di mas di 100% den comparacion cu aña 2019 cu tabata un aña record. Minister Oduber su maneho ta dunando su fruto,” e publicacion ta remarca.

Na mas di un ocasion Minister di Turismo a enfatisa cu e su maneho ta basa na busca e turistanan afluente, turista di calidad cu ta gana mas di 150 mil dollar pa aña. El a subraya cu gobierno ta keda haci inversionnan continuo den e producto Aruba pa asina Aruba keda competitivo den e industria turistico. “Un maneho caminda a diversifica Aruba su turismo den diferente mercado, mercadeando Aruba tur caminda y habriendo rutanan nobo.,” el a agrega.

El a destaca cu Aruba su turismo ta creciendo y cu e cifranan ta demostra esaki. El a confirma cu e mercado di Europa a cay cu 9.8%, cual ta representa 3222 turista, den comparacion cu luna di mei 2022, pero, segun el a indica, e mercado di Europa ta solamente alrededor di 8% di henter e mercado turistico di Aruba.

Di otro banda, el a agrega, e mercado di Canada a crece 108.1%, cu ta ekivalente na un crecemento di 15.846 turista.

“Pueblo por ta sigur cu Aruba su turismo ta riba e bon caminda. E demandanan pa Aruba como destinacion ta halto. Danki na e maneho di diversificacion awe tin mas cu un gateway pa yega Aruba for di Europa of cualkier caminda rond mundo. Turismo ta keda e driver di nos economia,” el a finalisa.