“Nos ta bay sinta cu Raad van Bestuur tambe pa nos haya scucha nan banda di medaya”

Diaranson mainta sindicato di hospital, ABV a reuni cu Minister di Salud Publico, Dangui Oduber caminda a presenta nan preocupacionnan riba e ultimo desaroyonan pa e situacion na hospital, unda cu Raad van Bestuur a propone pa ofrece pakete na 64 empleado di hospital. Den un conferencia pa medionan local, Minister Oduber a elabora un poco mas ariba con e reunion aki a bay.

Oduber a indica cu presidente di ABV, Gina Maduro a splica cu Raad van Bestuur di hospital a manda un carta dia 4 di maart pa tur empleado, y den e carta aki nan a splica diferente motibo pa cual tin intencion di reorganisa. Den esaki ta bay ofrece 64 empleado di hospital un pakete, pasobra segun nan ta splica den nan carta, e situacion financiero di hospital ta precario.

Oduber a subraya cu e reunion cu sindicato ABV a bay bon, unda nan a scucha con e reunionnan ta bayendo cu Raad van Bestuur, kico ta nan pensamento di e proposicion di hospital y con gobierno por yuda intermedia, den e caso aki, pa evita cu asina tanto empleado di hospital ta perde nan trabao.

“Mi ta bisa cu nos tabatin un bon reunion, nos tin respet pa e sindicato di hospital cu henter su bestuur pasobra nan ta un sindicato serio, nan ta un sindicato responsabel. Nan ta consciente cu e situacion no ta uno facil”, Oduber a expresa.

Manera ta conoci, Gobierno di Aruba ta den un situacion hopi complica pasobra tin cu cumpli cu e instruccion di Gobierno di Hulanda pa haci un recorte di 60 miyon florin den sector cuido. Oduber a recorda cu nan a bisa gobierno di Hulanda dos aña pasa caba cu pa haci reforma y corta 60 miyon florin den cuido ta hopi dificil.

El a remarca cu Ministerio di Salud y Gobierno di Aruba ta mas cu habri pa haci e ehercicionan necesario pa por haci reforma pa asina garantisa cu nan por sigui brinda e mesun pakete di AZV. “Nos sa cu tin espacio pa corta, pero 60 miyon ta bira un ehercicio hopi dificil pa cumpli cune, pasobra na final di dia si bo kier corta 60 miyon bo ta bay afecta cuido, bo ta bay afecta pashentnan y bo ta bay afecta empleadonan”, el a agrega.

Na mesun momento, Minister Oduber a coregi cu den e carta cu hospital a dirigi na su empleadonan nan a pone cu un di motibonan pa nan proposicion ta cu Gobierno di Aruba ta forsa nan cubri gastonan di construccion. Oduber a enfatisa cu e mester coregi esaki, pasobra e proyecto di hospital, cu na final ta bay costa casi un biyon florin, a conoce un retraso pa motibo di cambiamento di scope di hospital.

El a sigui splica cu seis aña pasa hospital a firma pa piso cinco wordo destina pa oficinanan y despues di algun aña nan a cambia di pensamento y a bisa cu nan no ta bay usa e piso mas pa oficina, sino pa cambernan di cuido. Segun el a remarca, pa e motibo aki no por pone comunidad di Aruba, e pagado di belasting, paga pa erornan cometi door di e Raad van Bestuur di hospital, cu a pesar cu a firma, aworaki ta bin cu cambionan.

“P’esey nos a bisa, si bo kier trece cambionan continuo mi no ta kere ta husto pa laga e pagado di belasting bay paga pa e gastonan adicional. Y e ora nos a pone e responsabilidad cerca nan y nos a bisa nan ya cu ta nan a bin cu e cambionan aki, mi ta kere ta mas cu husto pa nan tambe paga pa e cambionan aki. Kiermen mi no ta kere esey ta un hustificacion cu nan por usa pa bay retira empleadonan for di trabao”, Oduber a indica.

El a subraya tambe cu den su carta, hospital ta menciona cu e recorte di 5.5% cu ta wordo haci pa motibo di instruccion di Hulanda, tin consecuencia riba nan situacion financiero. Ariba esaki, Minister Oduber a señala cu na mas cu un ocasion conhuntamente cu AZV, Gobierno di Aruba a pidi cu nan kier un transparencia total di hospital tocante e 196 miyon florin cu nan ta ricibi for di AZV. “Nos kier sa for di hospital con e placa aki ta wordo inverti, con e placa aki ta wordo gasta pa asina nos tin un claridad kico ta e situacion financiero exactamente pa asina nos por trata na intermedia tambe pa nos por yega na otro pa asina evita cu asina hopi hende ta bay perde trabao”, el a aclara.

Pa loke ta trata e tema di cooperacion entre hospital y ImSan, Oduber a indica cu nan ta den proceso pa yega na acuerdo di cooperacion aki, pa asina den cuadro di eficiencia traha hunto y logra reduci e gastonan. El a recorda cu den luna di december gobierno tabatin reunion caba cu hospital y ImSan caminda ambos instituto a bay di acuerdo pa firma un MoU, pero ainda esaki no a wordo firma.

Minister Oduber a reitera cu e situacion cu Gobierno di Aruba ta aden no ta facil, pasobra tin presion continuo di gobierno di Hulanda pa cumpli cu e instruccion di reduci 60 miyon florin den cuido medico, y cu pa e motibo ey, e acuerdo di cooperacion entre hospital y ImSan ta hopi importante. El a menciona tambe cu sindicato di hospital, cu ta e sindicato di empleadonan na ImSan tambe, ta sostene e pensamento di gobierno pa e institutonan aki yega na un acuerdo di cooperacion pa asina den cuadro di eficiencia logra reduci e gastonan.

El a subraya cu sindicato ABV ta habri pa sinta na mesa pa dialoga pa hunto busca un solucion pa e situacion cu a presenta door di e carta di Raad van Bestuur. Na mesun momento, Oduber a aclara cu Gobierno di Aruba no tabata na altura di e carta aki. “Gobierno di Aruba no a wordo informa y no tabata na altura cu e carta aki lo bay sali den direccion di e empleadonan, pero ta un asunto cu nos ta atendiendo conhuntamente cu e sindicato”, el a bisa. “Nos ta bay sinta cu Raad van Bestuur tambe pa nos haya scucha nan banda di medaya pa asina hunto yega na un solucion den e caso aki”.

Pa loke ta trata e proposicion mes di Raad van Bestuur pa kita 64 empleado for di trabao, Oduber a remarca cu nan tin e pensamento cu prome cu tuma un decision asina lo ta bon pa gobierno haya un bon bista ariba e situacion financiero na hospital, pa haci un bon evaluacion y no core tuma un decision drastico.

El a duna como ehempel e situacion cu a sucede na aeropuerto, caminda e director di aeropuerto na un forma prematuro a retira 75 empleado for di trabao y despues a cuminsa busca tur e empleadonan aki back y yena vacatura tras di vacatura. “Nos kier evita pa esaki pasa na hospital y p’esey mester bin un decision hopi responsabel y pa tuma un decision responsabel ta mas cu na su luga pa gobierno tin tur e informacion aki pa conhuntamente cu e sindicato y Raad van Bestuur yega na un solucion cu tur hende por biba cune”, el a expresa.