Ayera nos a publica cu e aumento di salario minimo cu a wordo anuncia recientemente ta contra ley. E di dos punto cardinal ta cu semper mester pidi conseho di Sociaal Economische Raad (SER) y cu e fecha cu e mester drenta na vigor mester cuadra cu ley. Pero minister di Asuntonan Economico Richard Arends ta haya cu e decision recien no ta contra ley y cu gobierno tin e autoridad pa por haci e ahustacionnan aki.
“Nos ta prefera di haci e asina na luga di met terugwerkende kracht. Mi ta kere cu mester respeta e proceso legislativo. Pa e motibo ey nos tambe lo tabata kier pa e drenta na vigor den januari/februari, pero a sosode cu e mester a bay Staten y Conseho Consultativo p’esey el a drenta na vigor te prome di augustus”, minister Arends ta bisa Bon Dia. E mandatario ta splica nos cu e anuncio di e aumento di salario minimo a wordo anuncia caba desde december 2016. Caminda cu a bin cu serie di ahustacionnan pa por mehora poder di compra di esunnan di menos recurso, pero tambe pa comunidad en general di Aruba.
“E ta algo cu a wordo formalisa aworaki.”
Manera ta conoci, conseho di Sociaal Economische Raad (SER) tabata negativo pa e aumento aki entrante januari 2017. E conseho di SER tabata basa riba crecemento economico cu tabata conoci na e momento ey segun minister Arends. E mandatario ta bisa nos cu aworaki cu nos ta seis pa ocho luna despues , e prospectonan economico ta positivo y a base di esey ta opta pa haci uzo di discrecion di gobierno pa aumenta salario minimo.
Riba e criticanan cu si esaki tabata un accion politico pa haya mas voto, minister Arends ta enfatisa cu esaki no ta e caso mirando cu atrobe, e no tabata un decision nobo.
No a pidi peticion nobo na SER
Segun e mandatario, e aumento tabata e mesun peticion cu a wordo haci na SER y a tene cuenta cu conseho di SER mirando e partinan facultativo cu SER a menciona e tempo ey. “Segun nan 1 januari no tabata un bon fecha tampoco pa introduci e, nos ta na augustus y gobierno a haya esey rason suficiente pa por aument’e.”
Minister Arends ta subraya cu gobierno ta traha den un mundo presente y a base di e calculacionnan cu Banco Central a haci, y tambe e presupuesto. “Esaki a wordo anuncia tambe ora di tratamento di presupuesto cu lo mester tene cuenta cu crecemento economico y tambe cu aumento di salario minimo.”
Bon Dia Aruba ta subraya na e mandatario cu nos no a mira ultimamente positivismo den un crecemento economico, pues a base di kico gobierno a cambia di opinion?
Sr. Arends: “E decision a bin a base di loke e perspectiva economico ta mustra, y tambe e confiansa di actividadnan economico cu ta tumando luga aworaki, pa loke ta trata primordialmente sector energetico y rehabilitacion di refineria.”
Pero despues e minister ta enfatisa cu e motibo principal ta pa cera e buraco entre e salario minimo y e suma minimo necesario pa sobrevivi (bestaansmiminum).
Critica di gremio
Diferente gremionan manera ATIA, AHATA y Camara di Comercio no ta mucho contento con e decision aki a wordo tuma. ATIA por ehempel ta señalando cu esaki ta falta di transparencia di parti di gobierno. Minister Arends ta reacciona riba e critica di nan: “E tabata algo cu a wordo anuncia caba aña pasa cu a bay Staten, pues e no ta un sorpresa. Otro siman mi tin un reunion cu directiva di ATIA pa discuti esaki den mas detaye.”
Minister Arends ta bisa tambe cu ‘su manera di traha den e ultimo lunanan ta pa drenta den dialogo hopi cu sector comercial’, pa scucha y compronde kico ta e dolornan. “Obviamente ora ta trata salario minimo, ta wak e poder di compra di e ciudadano. Y obviamente esey por ta no ta beneficia directamente e dunado di trabao pero si un otro comerciante unda e persona cu tin minimumloon ta gasta su salario.”
