“ Mi no a wak e, mi no sa ken ta tras de corant. Contra ken mi ta bay haci un denuncia. Mi no tin tempo pa esaki. Pa mi por tir’e den prullebak.”
Esey ta e comentario di minister Benny Sevinger di Infrastructura riba e corant cu nan a distribui siman pasa, publicando un gran cantidad di e-mailnan, cartanan y otro documentonan papiando di manipulacion, soborno y corupcion di parti di Leoncita Arends y tambe e minister menciona. Esaki den cuadro di otorgamento di tereno.
No ta conoci kende ta tras di e corant aki, pero e mandatario ta duna indicacion cu esaki a bin for di e seno di MEP, e partido di oposicion. Sinembargo e mes no a wak e corant y tampoco ta concerni cu e contenido. Ora Bon Dia Aruba a puntra si e sea nan a discuti den Conseho di Minister pa haci un investigacion pa haya sa ken a lek, e minister ta bisa cu esey lo no ta e caso. “Mi no a lesa e corant y mi no ta interesa di wak e. Esun cu a skirbie mester sa unda el a haya e documentonan y considera si nan ta legitimo. Y si e considera e ta algo ilegal, e mester tuma su pasonan.”
E ta sigui cu: “Ami no ta bay sinta wak riba papel ken a bisa esaki, ken a plak un firma aki y ken a plak uno eynan. Echo ta cu si bo mester haya un tereno bo mester cumpli cu opcionnan. Si bo no ta cumpli, bo no ta haya e tereno. Esey ta e unico cu mi por contesta.”
E minister ta bisa cu e no ta haya un investigacion necesario aunke ta parce cu documentonan y corespondencia confidencial di e minister y tambe otro manera prome minister a lek for di diferente departamentonan. “Nos a haya un aparato gubernamental lamentablemente hopi polarisa. Hopi hende di partido MEP cu ta purba di saca documentonan cu ta kere cu lo tin algo robes den dje. Mi ta lag’e pa nan. Ami no tin nada di sconde. Si mi a firma un documento y e documento ey ta legitimo, mi ta para pa loke m’a firma. No tin nada malo na esey den mi concepto. Si tin otro hende cu ta kere tin algo malo den dje, nan por tuma nan pasonan necesario.”
Nos a puntra tambe si minister no kier actua contra acusacionnan di soborno y corupcion pa motibo di difamacion. Pero su contesta a keda mescos: e no ta interesa.
