Recientemente minister Otmar Oduber(POR) a haci peticion pa ricibi conseho di departamento Directie Natuur en Milieu Aruba (DNM) como tambe Dienst Infrastructuur en Planning (DIP) encuanto e proyecto di Isla di oro.
Pa locual ta e proyecto di Isla di Oro minister ta informa cu despues di un trayectorio largo cu e proyecto aki a pasa aden, y tumando e consehonan referente e importancia ecologico di e area aki den consideracion, a dicidi di no aproba e peticion pa por construi e hotel na e area aki. Esaki teniendo e bienestar di nos hendenan y nos medio ambiente na cuenta.
Esaki ta segun e comunicado cu nos a ricibi di minister Otmar oduber.
Por indica cu pa loke ta trata e desaroyo economico di Pais Aruba y tambe e importancia pa atrae e bishitante mas afluente cu berdaderamente lo por contribui na e economia di Aruba, esaki lo keda un punto di importancia. Sinembargo tur tipo di desaroyo manera menciona lo mester tuma luga den forma balansa y teniendo nos medio ambiente na cuenta.
Minister Oduber ta indica cu e tempo a yega pa trata e tema di medio ambiente y bienestar general cu seriedad y pone accion na palabra. Conserva nos medio ambiente y sirbi interes general ainda ta un tema cu conoce su retonan pero cu bon comunicacion y e intencion pa colabora tur reto ta wordo transforma den oportunidad.
E mandatario ta bisa cu manera por a tuma nota durante diferente proyecto y caso di cual e.o. De Veer Chain theaters (den wetland), Island Estates (den groengebied) ta forma parti, a actua conforme e maneho stipula den ROP cu por cierto ta hancra den Ley. Asina semper y cuando actuando conforme principionan di bon gobernacion di cual transparencia y integridad ta forma parti.
