Minister Michelle Hooyboer-Winklaar: Ta combersa cu Fundacion Muchila Creativo encuanto posibel proyectonan pa futuro

Recientemente tabata di bishita cerca Minister di Enseñansa Michelle Hooyboer-Winklaar dos miembro di directiva di Fundacion Muchila Creativo, esta Rosemarie Provence, presidente, y Emerita Emerencia, secretario. Fundacion Muchila Creativo ta traha riba aspectonan creativo, social, cultural, artistico, y terapia bao di e capa di educacion.

Minister Hooyboer-Winklaar a ricibi un presentacion encuanto di e diferente proyectonan cu nan a realisa y ta realisando for di tempo cu e organisacion a keda estableci 13 aña pasa, y ta reconoce nan esfuersonan como un trabao sumamente importante. E mandatario a expresa su admiracion pa e dos damanan fuerte cu a logra un trayectorio impresionante cu e fundacion, trahando cu hopi segmento den comunidad.

Pa loke ta trata e plannan pa futuro, Minister Hooyboer-Winklaar a comenta cu nan a combersa tocante e intencion y ideanan di Fundacion Muchila Creativo, cu ta pone un accento riba arte, cultura, baile y teatro den e ramo di educacion.

E titular di enseñansa a splica cu a papia tocante con ta uza diferente disciplina di arte pa beneficia aspectonan di enseñansa, manera siña muchanan conta, pero tambe con pa logra pa nan compronde aspectonan di materianan cu kisas ta mas dificil pa capta manera cierto topiconan di e materia fisica.

E fundacion ta desea di por yega na facilita hopi mas studiante cu e tecnica aki cu lo habri ful un otro mundo pa nan, segun e minister. El a agrega cu lo kier expande riba proyectonan den enseñansa cu ya ta tumando luga pa riba un base mas structural provee muchanan cu tin e necesidad pa haya acceso na e tecnica aki.