E minister responsabel pa firma permiso di hotel, esta Alex Schwengle, no a pone su firme bou di e peticion di Ocean Z y tampoco lo bay haci’e.
Esaki e mandatario a bisa Bon Dia. “E ta riba mi desk, pero cu e sentencianan di hues, e no tin balor mas. Hues hasta a dicta cu mester cambia e destino bek. Kico mi por haci cu e peticion e ora? Mi por mand’e bek di unda el a bin.”
E minister tambe ta bisa cu en general e procedura di permiso di hotel ta uno mucho complica, anticua y tin di mas departamento envolvi. Y ora e peticion finalmente a yega na su desk cu tur consehonan positivo, pone su firme ta nada mas cu un formalidad.
Origin problema
E ta bisa e origin di e problema cu Ocean Z ta cu nunca a finalisa e parti legal di plan di destinacion den cuadro di e Ley di Ordenanza Teritorial (aproba na 2007) y Plan di Maneho Teritorial (ROP) (finalisa na 2009). “Hasta mi ta kere mester un adaptacion atrobe pasobra den e plan tin area destina pa zona berde/ naturalesa, sinembargo gobierno a duna permiso pa construi.”
Riba pregunta dicon gobierno of e como minister no a percura pa regla esaki miho den tur e añanan cu a pasa, su contesta ta: “Mi ta un minister so. Y ora un permiso ta yega mi desk cu consehonan positivo di tur e departamento bou di mi otro coleganan, mi no por nenga sin base.”
Conseho minister
A puntra minister Schwengle tambe si a discuti e caso di Ocean Z den Conseho di Minister. Y dicon gobierno a cambia e destino di e tereno mientrastanto habitante a protesta y ya tabatin un caso den corte andando. “Si, nos a discuti e caso. Pero atrobe, mi ta un minister so.”
.JPG "Situacion na Malmok preserva por lo pronto")
