Awe ta prome dia di trabou di Minister di Ordenanza Teritorial, Infrastructura y Medio Ambiente Marisol Lopez Tromp. E pregunta cu tin ta con su dia lo ta hinca den otro.
Manera ta conoci, e Minister a interumpi su vakantie, unda el a hiba su yiu Hulanda pa su estudio, y mester a bolbe den 4’dia pa a confronta un reunion publico pa entrega un mocion di desconfianza contra su persona. Pero pa motibo cu supuestamente no tabatin claridad riba e documentonan di e comision di intermediacion, ta e lider di fraccion di POR , y te ainda colega di partido di Marisol Lopez Tromp, esta Dellanire Maduro a pidi pa suspende e reunion. Videonan despues a mustra cu e suspension tabata un palabracion di antemano cu Presidente di Parlamento sr Ady Thijsen. E suspension a cay pisa den comunidad mirando cu e Minister , despues di a tende pakico Parlamentarionan kier pa e retira, esta pasobra no tin bon comunicacion cu su partido, a trece hopi informacion di casonan cu el a topa den su Ministerio. Casonan cu entre otro awor ta bou investigacion penal. Y e Minister a bisa di lo a amplia riba mas caso den su di dos tanda. Pero nunca a yega na e di dos tanda. Awor ta pa mira si e reunion pa entrega mocion di desconfianza lo continua mesora, manera ley mes ta prescribi y si Minister Lopez Tromp awe ta asumi su responsabilidad legal como e mandatario responsabel pa Ordenanza Teritorial, Infrastructura y Medio Ambiente.
