Minister Marisol Lopez-Tromp: ‘No tin ningun motibo valido pa bisa mi pa baha’

Ayera den oranan di mainta na pia di sero Hooiberg, a convoca diferente medionan di comunicacion pa un conferencia di prensa di minister di Infrastructura, Medio Ambiente y Desaroyo Teritorial, Marisol Lopez-Tromp.

Diabierna ultimo Lopez-Tromp a ricibi un carta di partido POR, firma pa minister di Husticia, Andin Bikker den cual a menciona diferente punto cu e partido lo a dicidi y cu lo a conduci na e carta. A conclui cu e partido a perde e confiansa den Lopez-Tromp y cu e tin cu pone su funcion di minister na disposicion of baha como minister, asina tambe no firma ningun documento den su funcion. Ademas a pone un deadline cu tabata dia di ayera pa 8.30 di mainta pa Lopez-Tromp haci entrega di su retiro.

Di esaki, el a bisa cu desde cu el a huramenta como minister di Gabinete Wever-Croes, esey a sucede no solamente a base cu partido a propone su persona y cu tambe a wordo pidi p’e pa motibo cu e tabata lider di fraccion di partido POR na Parlamento. El a acepta e funcion pa motibo cu e ex-minister di Infrastructura, Otmar Oduber a bira malo y cu esey a wordo considera pa e por retira como politico; p’esey e por eherce su funcion como minister den proximo añanan y continua cu e liderazgo.

Den su funcion como minister, el a comenta cu el a haya hopi reto y desde prome dianan caba e mester a tuma algun decision importante pa e pais y te cu awor tambe tin cu haci’e.

“Tur reto cu mi a topa, pueblo por ta sigur cu mi a traha den un forma integro”, teniendo cuenta cu proceduranan di bon gobernacion, cu diferente director y cu segun e mes a sigura, no tur ta haci’e manera mester ta.

Algun dia pasa cu nos pais a pasa na e ‘normal nobo’ despues di e crisis di Covid-19, Lopez-Tromp a indica cu e ta cumpliendo cu cada punto di su gobernacion como minister. A trece e proteccion di 16 area pa naturalesa, un proyecto cu el a afirma cu a cuminsa varios aña pasa. El a menciona esaki pa motibo cu hustamente riba e punto aki, e proteccion riba e areanan y discusion riba Parke Arikok, ta wordo usa den carta di e partido, “tal como si fuera un pica of cu ta algo robes pa proteha loke nos tin”, el a afirma.

Di loke ta trata Serlimar, el a bisa cu esey tabata otro reto grandi, caminda cu el a haya cu un situacion cu den par di dia mester prepara, pa por ehemplo, trece casonan den corte of contractnan den directiva mester cera, entre otro incidentenan.

Pa e motibo aki, Lopez Tromp a duna un contesta pa e carta cu partido POR a manda p’e, e cual el a trece dilanti. “Ta straña mi si cu sr. Bikker ta dedica den e conferencia di prensa riba e dos punto aki y di e cual a bisa cu a perde confiansa den mi persona pa cu e maneho aki.”

Asina mes, el a bisa cu e carta cu el a ricibi di parti di Bikker no ta valido, pa motibo cu e reunion cu nan a yama y cu a conduci pa e carta ey no ta un reunion cu ta klop segun statuto di partido, no a sucede den un forma legal manera mester ta y no a bisa cua punto lo wordo trata.

Tambe el a comenta cu e puntonan di e carta, ‘aparentemente esunnan cu tabata den conseho di partido a aproba sin realisa of sin sa cu ta contra di e propio statuto di e partido, loke ta nifica cu e carta ta invalido’

“Cu e conviccion cu mi ta wak cu sr. Bikker a trece dilanti cu Parlamento tin intencion di baha mi como minister, pasobra esey ta e unico forma cu por sucede den un forma legal.”

Di loke a wordo poni den carta. cu Lopez Tromp no por firma un documento mas den su funcion como minister, el a comenta: “E ta kere di por instrui mi, mi no sa den ki posicion, pasobra esey no ta posibel tampoco como lider di partido of minister di Husticia pa mi no firma mas un documento, ta gobernador por ta bo ta kere bo ta?” el a sigura.

“No tin ningun motibo valido den mi opinion, cu mi a comete un acto contra ley pa bisa mi pa baha” el a manifesta.

Lopez-Tromp a laga sa cu el a manda pa e partido un carta den e cual ta bisa cu e no lo retira como minister. Di loke ta trata e decision cu a wordo tuma pa Parke Arikok, cu minister Bikker a menciona diabierna ultimo cu Lopez-Tromp no mester tuma, pa motibo cu esey ta forma parti di ministerio di Husticia, el a contesta cu Bikker tin cu lesa e ley bon. Pasobra e parke aki ta un fundacion, nan tin cu dicidi riba nan maneho di ken por drenta of sali for di parke, den e caso aki Parke Arikok ta algo proteha.

Referi pa un investigacion den compania Serlimar, Lopez-Tromp a sigura cu tempo pasa a haci un ‘financial scan’ pa haya un bista di con e compania aki a bay desde su inicio te cu aworaki. Unabes cu a inicia e surseance van betaling, den e caso cu un hues a apunta un abogado pa haci e trabou p’e, naturalmente ta bay sondea tur e situacion financiero y si tin cosnan cu ta necesario of no pa scapa e compania, esey ta un trabou serio cu a inicia y tin apenas un par di siman cu e ta kere cu por yuda pa yega na un situacion pa sanea y scapa e compania.