Durante conferencia di prensa Minister Marisol Lopez – Tromp a splica e banda di e aspecto di naturalesa tambe tin e parti di seguridad den trafico.

Ta un realidad cu diferente areanan natural/ proteha, den transcurso di añanan a sufri hopi door di daño cu a wordo cometi. Entre otro, por referi na e discusionnan continuo riba ATV/UTV. Aruba ta entre e poco paisnan cu ta permiti pa core UTV/ATV riba camindanan grandi/ publico. E vehiculonan no ta ‘safe’ pa e manehadornan y tampoco pa e siguridad en general di trafico.

Den cuadro di esaki 2 punto sumamente importante cual ta regarda specificamente Ministerio di Desaroyo Teritorial, Infrastructura y Medio Ambiente, ta:

(1) e proteccion y cuido di Naturalesa y Medio Ambiente, (2) pero tambe e proceso di keurmento di vehiculo cu ta tuma luga na Directie Technische Inspecties (DTI).

Considerando e diferente areanan proteha rond Aruba, e no ta e intencion pa e tipo di actividadnan aki continua den e areanan ey, esaki ta regla den e ROP/ROPV, Minister Lopez – Tromp a accentua.

Proceso pa keur.
Manera menciona anteriormente, DTI como departamento cu ta resorta bou di Ministerio ta e departamento encarga pa keur tur vehiculo na Aruba y tambe e vehiculonan aki. Pa cual mester remarca cu ta un grupo relativamente chikito di ATV/UTV ta acudi y cumpli cu e keuring.

E proceso di DTI pa ATV/UTV ta encera entre otro: control pa seguro valido, plachi di number mester ta paga y e diferente rekisitonan di e estado di e vehiculo. Esakinan lo determina si ta pasa e keuring of no. Tur e aspectonan aki ta sumamente importante pa percura pa mas siguridad di e manehadornan cu hopi biaha ta turista pero sigur nos localnan tambe.

Pa conclui, Minister Lopez – Tromp a indica cu pronto comunidad lo bay mira mas informacion di Ministerio cu lo enfoca riba proteccion di e areanan destina pa naturalesa, for di daño di e vehiculonan aki den futuro. Ademas, percura pa di un forma of otro logra cu e cantidad di e tipo di vehiculonan aki cu ta presenta na DTI pa keur ta aumenta. Pues un maneho cu enfoke specifico riba e aspecto di cuido di naturalesa y medio ambiente y siguridad a traves di e proceso di keuring.