Minister Marisol Lopez-Tromp, DOW y DNM tocante 16 area protegi Management plan pa proteha naturalesa y balornan civico historico

Ayera tardi durante un conferencia di prensa di minister di Infrastructura, Desaroyo Teritorial y Medio Ambiente, Marisol Lopez -Tromp, el a papia riba e 16 area protegi cu dos luna pasa a keda hancra den decreto gubernamental. Ademas el a comenta cu siman pasa tambe a tuma luga e traspaso di e areanan aki pa Fundacion Parke Nacional Aruba (FPNA).

Lopez-Tromp a splica cu aparte di e traspaso aki cu a tuma luga, tin mas trabou pa haci riba e proteccion di e areanan ey y concretisa diferente cosnan cu tin di haci cu esaki.

Marlon Croes, director di DOW cu tabata presente den e conferencia di prensa, a trece dilanti cu desde siman pasa DOW a wordo apunta pa cierto areanan conhuntamente cu FPNA. Di mesun manera el a splica e rol di DOW den areanan aki – por ehemplo, Bubali Plas cu desde aña 1972 a cuminsa opera y awa purifica ta bay den dje, e cual a crece y a bira loke ta awe.

Den cuadro di esaki, Croes a menciona cu DOW den ultimo añanan ta haciendo trabounan di mantencion den e area aki y banda di esey nan tin otro areanan apunta cu ta contene rooi. El a specifica cu tur aña dia 1 di juni lo cuminsa prepara pa temporada di horcan y ta haci tur rooi limpi pa asina por garantisa e fluho di awa si tin crisis of un yobida fuerte, cu lo por causa un molester pa e bisindario.

Den caso aki, FPNA hunto cu DOW tin cu reuni hunto pa traha un plan di mantencion completo integral, cu ta cubri parti di naturalesa flora y fauna, pero tambe e parti hidrologico di awa y con e mantencion y cortamento di mata tin cu tuma luga. Aworaki por medio di un landsbesluit DOW a formalisa caba hunto cu FPNA pa nan por maneha e facilidadnan aki.

Gisbert Boekhoudt, director di Directie Natuur en Milieu (DNM) a señala cu aparte di e funcion natural tambe tin funcionnan civico. Specificamente pa Bubali, pa asina e area keda funciona optimal y esey no por ta miho cu e funcion di un cu otro pa e parti di e naturalesa. Tambe el a bisa cu nan ta haci esaki pa motibo cu nan ta parti di un protocol di ‘special protected areas and wild life’, di cual Aruba ta forma parti. Y loke nan a priminti internacionalmente ta cu Aruba tin por lo menos un parke riba tera y un riba lama.

Di esaki, el a sigura cu nan ta cumpli cu mas di esey, pa e metanan di SDG’s cu ta proteha mas di e 10% di e costa cu e Parke Marino, cu tin mas di 25% di area protegi, cu hunto cu e 16 area mas por tin un proteccion mas sostenibel ainda pa e bestianan y matanan cu ta biba eynan.

Esun cu ta bay maneha e areanan aki tin e responsabilidad di Land pa via cu minister a pasa over na e organisacionnan aki. Pa nan maneha esaki tin e deber pa traha un management plan, cu ta un rekisito cu ta entre otro pa nan proteha e naturalesa, pero tambe e otro balornan cultural historico cu tin den dje. El a bisa cu lo traha e plan conhunto cu stakeholder, e usuarionan y unabes e usuario ta bay papia cu nan, ta yega na e principio con e area ta bay protegi. Lo pone tur esaki den un documento, den cual cada parti tin un responsabilidad y e borchinan cu a instala den algun areanan aki ta loke a keda palabra.

E reunionnan lo cuminsa otro siman, unda cu FPNA hunto cu DOW lo sinta pa cuminsa traha e plannan aki. Na cada sitio nan tambe lo pone borchinan pa informa cu ta areanan protegi y cu tin algun prohibicion. Por ehemplo Bubali plas tin prohibi pa hende drenta pa landa of cu canoa den dje.