Ayera Sra. Marisol Lopez-Tromp a huramenta como minister di Desaroyo Teritorial, Infrastructura y Medio Ambiente. “Cla pa e reto nobo!” el a bisa
El a presenta na e adres Maria Christinastraat 2, Cas Ceremonial di Gobernador di Aruba, compaña di su dos yiu muhe, Dominique y Marie Louise, unda den presencia di su demas colega di gabinete Wever-Croes, el a tuma posicion oficial di su funcion nobo dilanti Gobernador, Sr. Alfonso Boekhoudt.
Gabinete y ambiente politico.
Esaki ta e di dos biaha den su carera politico di mas cu 22 aña cu Lopez-Tromp ta forma parti di un gabinete y den ambos ocasion el a yega di carga e cartera di infrastructura.
For di 2009 tabata e ultimo bes cu el a yega di fungi como minister, y despues pa mas cu 10 aña el a eherce como parlamentario den diferente fraccion. El a reemplasa su colega di partido POR, Otmar Oduber, kende despues di asumi e cartera aki pa casi dos aña, a renuncia pa motibo familiar y di salud.
Encuanto e prioridadnan cu e lo duna durante su maneho, Lopez-Tromp a bisa cu tin acuerdo di gobernacion, y e lo continua cune.
E ta drentando den e periodo caminda ta falta 2 aña pa un eleccion, y esaki ta nifica pa continua cu cierto trabou cu ta andando. Pero tambe trabounan y leynan pendiente pa haci esakinan. E ta spera cu por conta cu e contribucion no solamente di su coleganan minister, sino di un y tur, entre nan prensa. “Pa duna opinion transparente na comunidad y opinion corecto. Y mi ta semper habri pa duna informacion,” el a bisa.
A pesar di e diferencia politico cu por a existi den pasado ora cu el a forma parti di partido MEP, aworaki como minister di un gobierno di coalicion (MEP-POR-RED), e kier pone na prome luga pais Aruba. Door di pensa pais prome y no obstante di cual partido bo por ta, esaki ta haci cu bo decision tin biaha ta trece consecuencianan pa e partido su pensamento of ‘un grupito su pensamento,’ segun Lopez-Tromp.
E ta kere cu como politico bo ta confronta topiconan cu ta dificil, y cu nan por trece diferencia di opinion. Pero importante ta cu banda di acuerdo di gobernacion y di pensamento di partido, pa semper ‘bo tin e paz cu bo mes…’
Experiencia.
Riba su experiencia di pasado como minister, e ta haya cu ta existi un gran diferencia, specialmente cu hopi cos a wordo modernisa. Tambe tin social media y Facebook, cu antes no tabatin e forsa cu awendia nan tin.
Otro aspecto cu Lopez-Tromp ta considera relevante ta e transparencia. E mester engrandece den cada un di bo decisionnan y actonan; y loke bo ta haci pa eherce un funcion.
Den esaki e ta haya cu gobierno actual tin un enfasis grandi riba e parti di integridad. “Esaki no solamente ta conta pa ministernan. E no solamente ta conta pa gobernacion, e ta conta tambe pa henter aparato publico…,” el a laga sa. Nan mester por conta cu henter un aparato publico cu ta tene su mes na reglanan di bon gobernacion.
E minister nobo a referi na su trayectorio politico di mas cu dos decada, tempo cu el a bay pa prome biaha ariba e lista di MEP. El a debuta den arena politico y como parlamentario den oposicion, logrando voto preferencial cu un cantidad di 1.538 voto, cu e tempo ey tabata hopi.
Despues di cuater aña como parlamentario, y despues di un eleccion unda el a logra casi 5 mil voto, Lopez-Tromp por a debuta como minister di Infrastructura, Asuntonan Social, Educacion y tambe vice-prome minister.
“Un combinacion cu awor ta wordo carga pa tres minister. E tempo ey pa un solo persona. Mi por bisa tabata un cartera pisa. Pero di otro banda importante pa desaroyonan di Aruba,” el a declara.
Lopez-Tromp a agrega cu den e gabinete ey nan a stimula economia. Nan a bin cu casnan social, scolnan, casnan di anciano y mas proyectonan cu a pone economia draai bon. Na 2009 el a bay bek na parlamento, caminda el a forma parti di e organo legislativo pa 10 aña. Durante e trayecto aki el a fungi como parlamentario di diferente fraccion, pero tambe como parlamentario independiente, ultimo tempo como lider di fraccion di POR, y tambe el a yega di asumi e funcion di presidente di Parlamento.
A base di su experiencia largo como parlamentario, Lopez-Tromp ta considera nos organo legislativo como un ‘universidad di personalidadnan y caracternan.’ Specialmente pa bo siña traha hunto.
E ta kere cu pa cada politico hoben e ta recomenda pa cuminsa e trayecto aki como parlamentario. E ta e caminda pa bo cera conoci cu tur e reglanan y leynan. “Loke ta importante pa prepara bo den un puesto di gobernacion,” segun e mandatario.
Awor cu e ta asumi un reto nobo como minister di e gabinete Wever-Croes, ainda e no a evalua si esaki ta un bon ocasion pa cera cu broche di oro su carera politico. E ta haya frecuentemente den transcurso di añanan, cu e ta wordo confronta cu e pregunta aki, y su contesta ta: “Cada epoca y cada periodo mi ta evalua y depende di e circunstancia, mi ta dicidi.”
