Minister di enseñansa, ciencia, cultura y deporte di Corsou, Marilyn Alcalá-Wallé, a laga sa cu e por a nota cu Acuril (Association of Caribbean University, Research and Institutional Libraries) ta un plataforma caminda tur esunnan envolvi pa locual ta trata biblioteca, por haci su actualisacion y tambe haya conocemento adicional. Pero tambe pa nan por duna nan contribucion na e comunidad aki.
Un tema cu e mandatario a referi na dje durante un entrevista cu Bon Dia Aruba, tin di haci cu tendencia den enseñansa publico, un cu ta gratis y otro cu mester paga. Un reto cu e mesun mandatario aki ta confronta den su pais.
Acuril un bon plataforma
Esaki tabata e prome biaha cu e mandatario Alcalá-Wallé ta asisti na un conferencia di Acuril. Alcalá-Wallé, kende tabata un huesped special den e evento aki, a laga sa cu e ta un ‘conferencia cu ta bale la pena, den sentido cu bo ta obtene basta informacion y hopi conocemento.’
El a menciona cu un aspecto general di e conferencia aki, unda biblioteca su funcion ta hopi esencial y importante, ta e parti di alfabetisacion. “No solamente alfabetisacion den su contexto tradicional. Pero tambe alfabetisacion den e mundo moderno,” segun e mandatario di Corsou. E ta agrega cu Acuril a brinda tur e calidad pa sali completamente renoba for di dje.
Enseñansa gratis y pago
Riba e parti di alfabetisacion, Bon Dia Aruba a puntra e mandatario cu tin un tendencia den enseñansa pa mantene gratis, y otro cu mester paga p’e. Actualmente e minister aki ta confronta un reto riba e tereno aki. El a relata cu Corsou tin experiencia riba enseñansa gratis y accesibel pa tur hende. Sinembargo, mirando cu nan fuente financiero ta limita, esey ta pone cu esunnan cu tin mas recurso financiero propio, nan ta beneficia mas tanto di e sistema gratis di enseñansa.
El a splica cu na Corsou tur hende tin igual acceso, y te hasta ta importante pa mantene pa tur hende tin igual acceso, riba sistema di enseñansa. Pero di otro banda, e ta haya importante pa un gobierno sostene esunnan cu tin menos fuente di entrada, y esunnan cu si tin mas entrada, por contribui un tiki mas tanto pa tur hende por haya mas forsa. Alcalá-Wallé ta nota cu na Corsou esaki ta algo cu a haci impacto grandi.
E mandatario a sigui splica cu, por ehempel, dos mayor cu ta traha y cu tin tur e fondonan pa nan cumpra tur e facilidadnan pa nan yiunan, aworaki ta haya tur cos gratis. “Nan por cumpra computer, nan por cumpra laptop y diferente cosnan extra pa e muchanan, pasobra tur cos ta gratis,” el a expresa.
Sinembargo, el a laga sa cu di otro banda bo ta haya un mayor cu por ehemplo ta soltera, y cu tin diferente yiu, y e no tin e forsa economico. Pero ya cu e fondo dedica pa enseñansa a wordo igualmente reparti, gobierno no por yuda uno mas cu otro. “Pues esunnan cu ta den un condicion di retraso, toch ta keda den un condicion di retraso. Pasobra e facilidadnan adicional cu e mester tin pa e por scala, bo ta wak ki akinan de facto, e ta keda toch un tiki atras,” el a declara na e matutino aki.
