Minister Maduro ta pidi comprension pa presion di trabao y ta enfatisa na CAft cu: ‘Recorte di salario den entidadnan publico no ta condicion di Gobierno di Reino pa subsidio di salario’

Falta di personal y hopi trabao ta motibo pakico Aruba no por a cumpli cu e medidanan den e Plan di Maneho pa Reduccion Gasto di Personal, BVP y e mehoracion di duna informacion y maneho financiero. Asina Minister di Finanzas mr. Xiomara Maduro a informa College Aruba Financieel Toezicht, CAft, como un reaccion riba e conseho riba e reportahe di ehecucion pa e di tres kwartaal di 2021.

Manera ta conoci, e conseho di CAft a bin na fin di November y e siman aki Minister di Finanzas a duna su observacion riba e conseho.

E cuadro di evaluacion a keda temporalmente poni un banda

Mescos cu e aña administrativo 2020, efectonan di e pandemia di COVID-19 a keda presente. P’esey cu Aruba a pidi pa por desvia di e articulo 23, inciso 1 di LAft temporalmente cu ta determina e normanan financiero pa Aruba. Aruba a haci apelacion pa desvia di nan pa por traha riba recuperacion di Aruba y enfoca riba haci economia y finanzas publico resiliente.

Deficit mas chikito

Den e di tres Reportahe di Ehecucion pa 2021, CAft a constata cu e deficit proyecta pa Aruba na 2021 lo ta mas chikito cu anticipa. Esey ta cuadra cu locual Gobierno tambe a mira y cu a keda inclui den e Presupuesto di 2021. E deficit cu ta spera lo ta 62 porciento menos cu a anticipa den e Presupuesto 2021.

BVP

Gobierno mester cuantifica e medidanan di e BVP a base anual den e di cuater reportahe di ehecucion y relata esaki na e presupuesto multiannual, CAft a bisa. Pero segun Minister di Finanzas, CAft ta na altura cu tin algun tempo caba trahando riba refina e maneho y e monitoreo di gastonan di personal. E trabao aki ta reparti entre dos departamento, esta Direccion Recurso Humano y Direccion di Finanzas. Ambos ta actor importante pa traha proyectonan cu ta sali di e landspakket. Ambos departamento ta sobrecarga cu trabao. Lo trata di cuantifica e medidanan (di e BVP) a base anual y relata esakinan den Presupuesto. Pero, en todo caso, resultadonan lo no keda presenta den e cuater reportahe di ehecucion. E meta ta pa esakinan keda refleha den sea e prome of di dos reportahe di ehecucion di 2022. (red. locual ta yamativo ta e hecho cu ta Prome Minister mes a bisa Parlamento cu ya no ta bay haci uso di e BVP sino ta bay usa otro norma pa baha gasto di personal).

Mehoracion di dunamento di informacion

CAft a mustra cu mester bin mehoracion den e forma cu ta duna informacion riba e adelanto di e analisis basico (nulmeting) y mehoracion di maneho financiero y cu esaki mester ta refleha den e di cuater reportahe di ehecucion. Pero Minister Maduro a bolbe ripiti cu Direccion di Finanzas ta sobrecarga cu trabao na e momentonan aki y cu esaki tin consecuencia negativo pa adelanto di e proyecto pa haci e cuentanan anual mas controlabel. Aruba lo tene cuenta cu e consehonan di CAFt, pero ta pidi e colegio pa mustra comprension cu pa e motibo aki tambe lo tin retraso. E meta ta pa den e di dos sino di tres reportahe di ehecucion di 2022 mehora e provision di informacion.

Entidadnan publico

CAft tambe a urgi pa apela na entidadnan publico, manera companianan di utilidad pa keda pasa e recorte di 12.5 porciento pa caha di Gobierno. Minister di Finanzas a recorda CAft cu na prome luga, esaki no tabata un exigencia ni un condicion di Conseho di Minister di Reino. A pidi e entidadnan publico pa haci recortenan y entrega e sumanan aki na Gobierno pa yuda paga FASE, cu excepcion si e situacion financiero di e entidad no tabata permiti esaki (red. den su carta ayera na Tweede Kamer, Secretario di Estado Raymond Knops a mustra cu debidamente e ta parti di e condicionnan).

Proximo reportahenan

CAft kier mira cu ta ilustra e adelanto den cobramento di pago di mas di subsidio salarial (loonsubsidie) den e proximo reportahenan di ehecucion y cu ta caba cu e control di e pagonan haci na aña 2021 pa mas tarda April 2022.

Minister di Finanzas a bisa di lo tuma e conseho aki, pero cu mester tene cuenta cu ta awor numa a crea e fundamento legal pa cobra e fondonan paga di mas. E ley di subsidio salarial a pasa recien. Ademas, e proceso di cobra bek lo tuma su tempo mirando cu mester tene cuenta cu eventual proceduranan huridico, entre otro e uso di deurwaarder. Lo trata pa conclui e control pa April 2022, pero mirando e motibonan menciona no por garantisa un resultado manera CAft ta desea.

Loonsubsidie di mas den caha di Gobierno

CAft a conseha cu e suma cu a paga di mas na subsidio salarial y cu mester cobra bek, lo mester bay den caha di Gobierno. Minister di Finanzas a bay de acuerdo cu e conseho aki y ta bisa cu esey ta bay ta e caso tambe.