Den e crisis di Covid-19, Minister di Finanzas, Xiomara Maduro hunto cu un team di profesionalnan ta trahado duro pa percura pa e stabilidad financiero di Pais Aruba y banda di esaki ta buscando e fondonan necesario pa por brinda e alivio cu Pueblo y comercio ta spera di por haya fo’i Gobierno di Aruba.
Mester stabilisa e sistema
Den e crisis aki Minister di Finanzas ta trahando pa stabilisa e sistema mas cu por, segun un comunicado di prensa. E trabou aki no ta facil, ya cu Pais Aruba ta den un situacion na unda cu nos finanzas publico no tin un buffer financiero pa wanta un sla di e magnitud cu e crisis di COVID ta ocasiona. E cashflow di Gobierno mester keda sigura pa asina nos Pueblo por keda conta cu e seguridad social cu AZV, SVB y e servicio publico ta brinda. Banda di esaki Minister di Finanzas ta buscando e fondonan necesario riba mercado internacional y via Reino Hulandes, pa por brinda ayudo na persona cu ta perde trabou a causa di e crisis aki y pa por brinda poco alivio na comercio, segun e comunicado
Ok pa subi mercado internacional
Diaranson mainta Maduro a haya e autorisacion di Conseho di Minister di Reino pa por subi mercado internacional pa busca e fondonan necesario pa por cubrigasto di debe y gobernacion, y pa por brinda alivio den e prome lunanan di 2020. Maduro ta indica cu ta hopi importante pa nos
Yega na e fondonan aki pronto pa asina nos por wanta como Pais te na momento cu nos por haya yudansa di parti di Reino Hulandes.
Yudansa di Reino den forma di fiansa
Pa aworaki ta bisto cu e ayudo cu Aruba y e otro Paisnan den Reino por conta cune di Reino lo bira un yudansa den forma di fiansa mara na condicion. Pues no lo tin yudansa den forma di un suma di placa por nada. Tur fondo cu ta necesario pa brinda alivio lo bira un extra debe pa Aruba y nos lo tin cu bay pagaesa ki bek. Conseho di Reino ta wardando conseho di CAFT pa asina por indica e suma di fiansa y bou ki condicion esaki lo bira disponibel. Maduro ta spera cu pronto, prome cu fin di april, e detayenan di e yudansa aki bira conoci.
Espacio financiero pa yudansa ta limita
Maduro tin comprension y tin e intencion noble pa por brinda alivio na tur persona cu ta perde trabou y tambe lo kier brinda un alivio hopi mas grandi na comercio cu ta pasando den temponan hopi dificil, pero e realidad di e situacion financiero di Aruba ta limita e espacio financiero pa brinda e yudansa desea. No obstante e realidad aki, segun e comunicado, Maduro ta keda traha duro pa yega na e fondonan necesario pa por brinda alivio na comunidad.
