Durante fin di siman por a nota varios ciudadano haciendo compra. Aki ta unda cu Minister Maduro ta bolbe enfatisa cu tin suficiente productonan alimenticio na Aruba.
E mandatario ta haci un yamada na comunidad pa ban ta solidario specialmente pa nos hende grandinan y otro ciudadanonan vulnerabel. Si bo tin cu haci compras corda pa cumpra lo necesario y asina por tin suficiente producto pa nos tur.
Alabes e mandatario ta haci un yamada na tur comerciantenan pa no haci uso di e crisis aki pa subi nan prijs. E mandatario ta recorda tur ciudadano pa download e APP ‘Control di Prijs’ riba cual ta haya prijs di productonan den e canasta basico y di e extra productonan cu temporalmente ta wordo regula y tambe e prijs di productonan den Macuto di Compras. Riba e APP aki tambe por manda keho si nota cu tin abuso di prijs na un establecimento. E APP ‘Control di Prijs’ ta gratis y ta obtenibel riba GOOGLE PLAY pa telefon Android y APP STORE pa telefon Apple.
Minister Maduro a nota tambe varios comerciante innovativo cu ta ofrece nan servicio y/of productonan online. E mandatario ta haci un yamada na nos pueblo pa apoya nos comerciantenan local, haci uso di nan servicio/productonan cu nan ta ofrece y asina sostene nos economia.
Ban uni den un actitud solidario pa asina Pais Aruba por pasa door di e crisis COVID-19. Cuida nos mes, cuida nos famia y cuida esnan rond di nos. E mandatario ta enfatisa pa sali cas ora ta estrictamente necesario.
