Durante e conferencia di prensa diaranson atardi tocante e conferencia anual di Enseñansa, Cultura y Ciencia entre e 4 paisnan di reino, Minister di Cultura di Aruba, Xiomara Maduro y Minister di Cultura, Enseñanza y Ciencia di Hulanda, Robbert Dijkgraaf, a elabora ariba e topico di pasado de sclavitud, cual tabata e tema di enfoke di e reunionnan pa loke ta trata cultura.

Minister Dijkgraaf a indica cu durante e reunionnan cu tabatin cu Minister di Cultura nan a dialoga, y lo sigui dialoga, ariba un tema importante cu ta uni e paisnan, y esey ta pasado, specificamente e pasado di sclavitud.

Manera ta conoci dia 19 di december, Minister President di Hulanda, Mark Rutte a duna e prome stap importante cu e disculpa cu e Gobierno di Hulanda a ofrece pa Hulanda su envolvimento den e pasado di sclavitud. “Minister President, Mark Rutte, a enfatisa cu e prome stap ey ta un coma, no un punto final y cu aworaki, den conhunto, nos lo traha riba e siguiente stapnan,” Dijkgraaf a remarca.

El a splica cu e siguiente stapnan aki tin di haber cu e aña di conmemoracion di cu lo cuminsa dia 1 di juli di e aña aki. Durante e aña di conmemoracion, segun Minister Dijkgraaf ta señala, nan lo enfoca ariba e sociedadnan den comunidad.

El a agrega cu tambe tin fondonan disponibel, pero nan ta enfoca ariba e dialogo tocante e periodo despues, con nan por sigui siña mas di pasado, den cual tambe enseñansa, cultura y ciencia ta instrumentonan importante den tanto e efecto y pa siña mas di dje, “y esey nos ta haci naturalmente for di otro,” el a bisa.

Dijkgraaf a remarca cu un di e cosnan cu el a ripara durante su bishita na Aruba ta cu e cuater pasinan di Reino ta mas uni cu otro cu el a pensa y cu e historia ta mas complica di locual el a pensa. “Mi ta kere tur cuater di e paisnan ta duna esaki, den un maneho rico, yen di significado na e comunidad y e ta hopi special pa t’ey akinan y por realisa e reunionnan aki,” el a expresa.

Minister di Cultura di Aruba, Xiomara Maduro, a indica cu durante su participacion den e vierlandenan overleg cu a tuma luga na Corsou pa e parti di cultura, nan a dialoga ariba varios tema, manera entre otro un fondo di cultura dentro di Reino, pero tambe educacion di cultura pa e muchanan na scol pa asina nan por siña di cultura for di chikito caba.

El a sigui splica cu nan a papia tambe di loke ta patrimonio inmaterial y tambe tocante e patrimonio subacuatico. El a remarca cu esaki ta dialogonan cu nan tin algun tempo caba ta realisa. “Aruba ta trek fondonan di cultura, tambe educacion di cultura, nos a papia di tur e gruponan di trabou, e trabou cu ta wordo realisa.”

For di Hulanda e Secretario di Estado pa Cultura y Media tambe tabata presente y Minister Maduro a señala cu nan a tene reunion y el a reuni tambe cu Minister Dijkgraaf y e reunion aki tabata concentra mas ariba e pasado di sclavitud.

“Manera a wordo indica caba e ta un parti di e historia di nos tur, un parti di historia cu te cu dia di awe tin su efectonan tambe y na final di dia e trato cu otro tambe ta parti di cultura. Tambe a dialoga ariba e disculpa ofreci, pero sobre todo ariba kico ta bin despues di e coma den e proximo añanan,” Minister Maduro a indica.

El a enfatiza cu no solamente ta importante loke sucede durante e aña di conmemoracion, cu desde luna di juli e intencion ta cu lo tin diferente programanan, pero tambe hopi importante cu nan por tin un bista tocante con lo sigui avansa cu e parti aki di historia como fundamento den Reino.

El a agrega cu tin hopi trabou pa realisa y na Aruba ya caba nan a tene un sesion cu e stakeholders y a papia tocante e pasado di sclavitud. El a subraya cu durante e prome dialogo nan a enfoca mas ariba e disculpa, cual nan a kere cu lo tuma luga e aña aki, pero a tuma luga prome.

Minister a informa cu diahuebs nan lo mester a reuni cu e stakeholders y mas hende acerca pa asina hunto, desde e punto di bista di comunidad, nan por indica kico nan ta haya ta importante na Aruba pa loke ta trata conscientisacion pasobra hopi hende no sa di e pasado di sclavitud na Aruba, pero tampoco con e tabata dentro di Reino.

“E momento ta awo pa fomenta e conscientisacion den comunidad, pero ta hopi importante tambe pa nos sa desde Aruba kico nos lo kier wak den e aña di conmemoracion, kico nos kier conmemora, ki tipo di informacion, ki tipo di actividadnan nos lo kier tin acerca y naturalmente,” Minister Maduro a comenta.

El a menciona tambe, cual Minister Dijkgraaf a referi na dje, cu tin fondonan disponibel y tocante e fondonan aki nan lo tin combersacion tambe pa asina e NGOnan ta na altura cu tin fondonan disponibel pa nan programanan, nan programanan ariba conscientisacion y programanan pa loke nan lo kier wak den e aña di conmemoracion.

“Importante tambe ta, y manera Minister Dijkgraaf a indica caba, e no ta stop despues di e aña di conmemoracion, e ta sigui y esey ta e ora e parti importante,” Minister Maduro a accentua.