Recientemente AHATA a entama un caso contra Gobierno relaciona cu un disputa den cual AHATA y su conseheronan fiscal ta considera nan interpretacion di e ley di impuesto pa turista esun corecto y ta exigi Gobierno pa adapta e declaracion di toeristenheffing bao di menasa di un multa di Afl. 100.000 pa cada dia cu Gobierno no cumpli cu e sentencia di corte.

Cuadro Legal

Pa medio di e Landsverordening toeristenheffing, Gobierno ta cobra impuesto riba e pago cu un huesped di un hotel of otro alohamento turistico ta paga pa e uso di e camber of alohamento turistico. Na 2022, e tarifa di toeristenheffing tabata 9,5%. Pa medio di un cambio di ley e tarifa aki a ser ahusta pa 12,5% entrante 1 di januari 2023 como parti di Plan di Impuesto 2023.

E operador di un hotel of alohamento turistico mester entrega tur luna su declaracion di toeristenheffing y esaki mester wordo entrega no mas tarda cu dia 15 di e luna siguiente. E declaracion aki ta sosode desde 2020 den un forma digital pa medio di e portal “BO Impuesto” di Departamento di Impuesto (DIMP).

Segun un comunicado di gobierno, AHATA ta demanda pa Gobierno wordo condena y ordena pa ahusta of laga ahusta e formulario digital di declaracion di toeristenheffing 2023, pa asina e miembronan di AHATA tin e posibilidad pa haci nan declaracion di impuesto pa turista contra e tarifa di 9,5% pa reservacionnan haci den aña 2022 cu a ser paga completamente den aña 2022 pa cambernan cu lo wordo usa den aña 2023.

Segun e comunicado, AHATA ta basa su demanda riba e hecho cu Gobierno lo ta malinterpreta e ley di impuesto pa turista y ta actuando contra di un promesa haci riba 29 di december 2022. Ademas, Gobierno ta rechasando rotundamente, segun AHATA, di cambia e formulario digital pa haci declaracion na un tarifa di 9,5% y ta actuando na un manera ilegal causando daño na e miembronan di su organisacion.

Veredicto

Corte den prome instancia ta conclui cu e pregunta si e corespondencia di 29 di december 2022 a crea un confiansa hustifica, ta un pregunta cu un Hues specialisa riba tereno di impuesto mester responde.

Den e caso di e kort geding aki, solamente por evalua ki probabilidad tin cu un Hues specialisa riba tereno di impuesto lo yega na un contesta afirmativo na e pregunta aki. Na opinion di Corte den prome instancia, no ta posibel establece cu suficiente grado di probabilidad cu un hues specialisa riba tereno di impuesto lo yega na e conclusion cu a crea un confiansa cu miembronan di AHATA no mester paga e tarifa di 12,5% pa reservacionnan cu a ser haci y paga durante aña 2022 pa e estadianan den aña 2023. Pa e evaluacion aki, Corte den prome instancia ta haya importante pa menciona cu e toeristenheffing, manera cu AHATA mes a menciona den corte, ta ser declara y paga despues di e estadia, pa miembronan di AHATA.

Ademas, sin desaprobacion di AHATA, Gobierno a menciona den corte cu den pasado tabatin varios aumento di e toeristenheffing y cu esakinan a wordo implementa sin ningun problema, na unda e momento di uso tabata e momento decisivo pa declara y haci e pago di impuesto corespondiente. Segun Gobierno, miembronan di AHATA ta bon conoci cu e consecuencianan di cambio di tarifa riba tereno di toeristenheffing.

E Hues a yega na e conclusion cu AHATA no a demostra suficientemente cu e tarifa di 12,5% di impuesto di turismo lo no por wordo cobra pa e anochinan reserva y paga den aña 2022 pa estadianan den aña 2023.

Tambe, hues a conclui cu Gobierno no ta comete niun acto ilegal door di no adapta e formulario di declaracion digital pa por declara e tarifa di impuesto na 9,5%. Finalmente, e Hues a conclui cu e tarifa di impuesto nobo ainda por ser cobra na e huesped pa su estadia den 2023. Pa e motibonan aki, e demandanan di AHATA a keda rechasa.

Tarifa nobo ta aplicabel

Como consecuencia di e decision aki, e miembronan di AHATA lo mester declara y paga e tarifa di toeristenheffing nobo cu ta 12,5% pa e reservacionnan haci den aña 2022 pa e estadianan den aña 2023.