Den e dianan aki e discusionnan a cuminsa a lanta cabes riba e topico di e refinanciamento di e debenan haci door di Aruba na Hulanda pa cubri e gastonan relaciona na e pandemia. Minister Maduro a tuma nota di informacionnan incorecto cu ta circula specialmente riba medionan social relata na e financiamento di e debe di nos Pais.
Pa e motibo aki Minister Maduro di Finanzas un bes mas ta brinda e informacion corecto tocante di finanzas publico di Pais Aruba.
Informacion financiero di Pais Aruba ta riba www.gobierno.aw
Minister di Finanzas ta informa Parlamento di Aruba cada kwartaal riba, entre otro, e desaroyo di e debe di Pais Aruba den e ‘Uitvoeringsrapportage URK’ cu ta disponibel riba www.gobierno.aw.Ta importante pa no solamente Parlamento, pero particularmente Pueblo por mira den tur transparencia con e desaroyo di e debe di Aruba ta, kico ta e modalidadnan y ken Aruba ta debe placa.
Aruba ta fia fo’i institutonan di bon reputacion
Minister di Finanzas ta enfatisa cu Pais Aruba cu ta forma parti di Reino Hulandes no por fia placa na IMF, ya cu Reino ta un donor di IMF. Gobierno di Aruba ta fia solamente di institutonan financiero renombra y di bon reputacion, y Aruba no ta fia placa cerca otro Paisnan manera, por ehempel, China manera ta wordo menciona riba media social.
Proceso pa fia ta rigoroso y cu aprobacion di Hulanda
E mandatario ta subraya cu pa Aruba fia placa riba mercado internacional tin un proceso rigoroso cu mester wordo encamina. Parti di e proceso tambe ta encera e aprobacion previo di Conseho di Minister di Reino basa riba articulo 29 di Statuut pa Aruba por cera acuerdonan di fianza riba mercado internacional
Busca informacion corecto prome cu publica riba medionan social
Minister Maduro ta haci un apelacion pa den e discusion riba supervision financiero bou di un ley di Aruba LAFT of un Ley di Reino Hulandes RAFT, uza informacion corecto di finanzas publico di Aruba. Esaki tur kwartaal ta disponibel den e Uitvoeringsrapportage URK cu ta wordo publica riba www.gobierno.aw. Critica riba gobernacion ta libertad di nos tur riba Aruba, pero Pais Aruba mester wordo trata cu respet. Finanzas Publico ta un tema complica. P’esey ta masha importante pa busca pa sa tocante di e topico di financiamento di e debe di Pais Aruba prome cu publica informacion eroneo cu ta atacha e imagen di nos Pais.
