Dialuna atardi Minister di Finanzas, Economia y Cultura, Xiomara Maduro a reuni cu Fundacion Rancho pa asina por tende mas di e trabounan di e fundacion pa conserva historia y cultura di Rancho.
Segun un comunicado di gobierno, e fundacion a duna un presentacion di nan trabounan y a indica nan deseo pa por bay conserva y maneha e markthallen y tambe Schoenerhaven cu ta sitionan emblematico di Rancho. E intercambio cultural y comercial cu La Guajira tambe ta un punto importante pa e fundacion, ya cu esakinan ta lasonan estrecho cu semper a existi entre Aruba y Colombia y cu awor mester wordo reconecta. Fundacion Rancho a cuminsa traha di aworaki caba riba e celebracion di 200 aña di Oranjestad na aña 2024 cu lo ta yena di actividad pa nos tur por cera conoci mas cu e diversidad cultural cu ta tipifica e bario di Rancho.
