Diamars atardi, Minister di Finanzas y Cultura, Sra. Xiomara Maduro a haci entrega di presupuesto di pais Aruba pa aña 2022 na Presidente di Parlamento di Aruba, Sr. Edgar Vrolijk. Durante e conferencia di prensa Minister Maduro a elabora ariba e puntonan mas importante y tambe cambionan cu a resalta den e presupuesto aki compara cu aña pasa.

Manera a bira un custumber a haci e entrega di e presupuesto den forma digital, cu ta inclui tur e informacion y tur e consehonan tambe cu a bin di presupuesto di pais Aruba 2022 y tur parlamentario lo ricibi un memory card cu tur e informacion tambe.

Minister Maduro a recorda cu na cuminsamento di e aña aki el a duna un conferencia di prensa den cual a indica kico ta e puntonan mas importante. Den esaki ta premira cu entrada cu lo ta 1275 miyon florin, pa gastonan tin premira 1566 miyon florin, y lo core cu un deficit financiero e aña aki di 291 miyon florin cual ta ekivalente na 5.2% di e GDP.

El a splica cu e aña aki e necesidad financiero ta 1305 miyon florin y algun di e gastonan mas cardinal ta por ehempel gasto di personal cu ta 438 miyon florin, servicio di producto ta 226 miyon florin, interes ta 266 miyon florin y subsidio ta 212 miyon florin.

Pa loke ta entradanan, Minister Maduro a menciona ta primera cu impuesto directo lo ta 481 miyon florin, impuesto indirecto 551 miyon florin, inversion ta conta pa 37 miyon florin y fiansa pa estudio 26 miyon florin.

“Esaki ta en corto kico ta e gastonan mas importante. Manera nos a bin ta splica sigur e necesidad financiero di pais Aruba pa e aña aki pa locual ta gastonan di exterior, e debe externo, esaki cu yudansa di Hulanda nos a ricibi un suma aña pasa y e aña aki tambe e siman aki nos a firma pa ricibi un suma pa por haya paga locual ta e necesidad financiero na locual ta debe externo di e aña aki”, el a indica.

El a señala tambe cu e debe internacional pa e aña aki ta 346 miyon florin y esaki conforme locual ta e acuerdo cu Hulanda, Aruba lo ricibi e suma aki pa por cubrie.

Minister Maduro a subraya tambe cu e aña aki den necesidad financiero e suma di e debe cu Aruba a acumula di e yudansa cu Hulanda a brinda pais Aruba den e momento di e pandemia di Covid ta 904 miyon florin y el a indica cu ariba esaki ainda nan ta deliberando cu Hulanda pa asina por dicidi con ta bay atende cu e debe aki.

Pa locual ta debe local el a señala cu esaki ta 110 miyon florin y conforme palabracion cu Hulanda esaki lo wordo financia riba e mercado local. El a menciona tambe cu e deficit di 291 miyon florin lo mester bay via di sosten di likides di Hulanda, y si acaso no ricibi esaki e lo mester bay riba mercado local.

“Esaki tambe ta indica sigur pa locual ta e necesidad financiero cu Aruba ainda ta depende di Hulanda y esaki tambe ta trece cune den e discusionnan cu nos tin ariba local ta e condicionnan cu Hulanda ta pone pa e fiansa. Aworaki den e presupuesto tambe por bay debati ariba e parti aki caminda bo ta wak cu tin condicionnan, dus Aruba tin mester di e yudansa di Hulanda y pesey e ora mester por cumpli cu e condicionnan cu tin poni”, Minister Maduro a agrega.

Cambionan importante cu Minister Maduro a elabora riba dje cu ta resalta den presupuesto di pais Aruba, el a remarca cu manera ta conoci tabatin un discusion caba cu a cuminsa riba locual ta bira e ocho miyon florin di gasto di personal cu ta subi y el a splica cu esaki ta pa e recorte di 12.6% di cual gobierno kier compensa of pone back locual ta e 5% di e salario.

El a sigui splica cu aworaki tin discusionnan cu Hulanda ariba e parti ey pasobra asina nan por paga full e 100% di e salario, pero di otro banda tin un entrega cu tin cu tuma luga. Riba esaki, el a indica, gobierno ta papiando ainda cu e sindicatonan y tambe cu Hulanda pa por yega na un solucion y si acaso cu no por yega na un solucion claramente lo tin cambionan cu lo tin cu wordo haci na presupuesto di pais Aruba. “Pero te cu aworaki esaki ta e suma cu tin pa locual ta e subida pa locual ta gastonan di personal”, el a bisa.

Otro cambionan cu el a subraya ta cu servicio di producto tambe ta subi cu 26 miyon florin, esey ta pa escogencianan di maneho cu tin, el indica, y den e debate publico lo wordo duna mas informacion. Gastonan di interes tambe ta subi cu 8 miyon florin y el a splica cu esey tin di haber cu tin cu bay re-financia gastonan y esaki ta trece extra gasto di interes.

Pa locual ta subsidio, el a indica cu esaki ta subi tambe cu 10 miyon florin y tin di haber cu locual ta bira e pago back caminda cu ta haci recorte pa haci esaki menos e pago di 50% ta trece cune cu tur locual ta e subsidio cu ta wordo brinda, tambe ta subi cu 10 miyon florin

“Manera indica pa gobierno por paga back full e salario di e empleado publico, incluso esun cu ta wordo subsidia, esaki lo significa den presupuesto di pais Aruba un subida di 18 miyon florin”, Minister Maduro a indica,

Pa locual ta belasting directo, el a señala cu esaki ta subi cu 64 miyon florin y tambe belasting indirecto ta subi cu 42 miyon florin. Esaki tin di haber cu e mehoracion economico cu ta wordo spera e aña aki.

Pa loke ta trata inversion, esaki tin un suma di 16 miyon florin extra den dje. Minister a splica cu normalmente e ta 20 miyon pero e biaha aki e ta 36 miyon florin cu tin di haber cu e trabounan urgente cu tin cu sucede na e planta di RWZI.

Pa locual ta entrada, Minister a indica cu ta premira, door di e mehoracion economico, cu lo ricibi 162 miyon florin mas cu e aña anterior y gasto tambe ta baha cu 120 miyon florin pa motibo cu e aña aki pais Aruba no ta brinda sosten financiero mas na comercio y no tin tampoco e otro gastonan cu tabatin pa loke ta sosten financiero.

Necesidad financiero, el a subraya, compara cu aña pasa esaki ta bay subi cu 112 miyon florin y e deficit financiero tambe ta baha compara cu aña pasa cu 295 miyon florin.

“Esakinan ta e partinan cu ta resalta den esaki. Mester bisa cu na januari nos a pasa den locual ta e comentario CAft ariba e presupuesto di pais Aruba, gobierno a reacciona y tambe nos a haya cuater punto di comentario di Raad van Advies, esaki nan tambe gobierno a contesta y aworaki Parlamento di Aruba ta haya e informacion aki y a pidi presidente di parlamento si asina awo cu e documentacion a yega si nos por conta cu e cooperacion di parlamento of di presidente pa asina por pone esaki den agenda pa e ora nos por bay over proximamente na locual ta bira e tratamento y tambe e debate publico pa presupuesto 2022”, el a finalisa.

Sr. Vrolijk a indica cu lo cuminsa cu e proceso pa asina por yega na tratamento di e presupuesto den Parlamento di Aruba mas pronto posibel y segun su estimado, lo trata esaki prome cu final di luna di maart.