Den un carta dirigi na presidente di Staten, acompaña pa copia di e sentencia den e caso FPNA vs Fundacion Aruba Offroad, ministro Marisol Lopez Tromp di Ordenanza Teritorial, Infrastructura y Medio Ambiente, ta mustra riba e hecho cu den e sentencia huez a bari argumentonan di partido POR, cu Lopez Tromp lo a mete den cartera di su colega minister y lider di partido Andin Bikker.
Manera ta conoci, e fundacion Aruba Offroad a demanda no solamente Fundacion Parke Nacional Aruba, pero tambe Pais Aruba, particularmente e minister encarga, Lopez Tromp, di ta tuma decision cu no ta cay dentro di su autoridad. Ta e mesun argumento cu e partido di e minister a usa pa pidi su retiro.
Manera ta conoci FPNA a gana su caso y minister Lopez Tromp ayera, riba su prome dia di trabao despues di a bolbe di Hulanda, a entrega copia di e sentencia na presidente di Parlamento mr. Juan Ady Thijsen.
Den e cartanan di 5 di juli y 24 di juli, POR a bisa Lopez Tromp di ta tuma decisionnan unilateralmente contra maneho di minister di Husticia Andin Bikker. Como ehempel a usa e argumento cu Lopez Tromp a purba atribui na su ministerio, autoridadnan cu ta pertenece na colega minister di su partido, door di anuncia cu ta cera acceso selectivamente (pues solamente pa cierto vehiculo) riba camindanan publico den Parke Nacional Arikok. A acusa Lopez Tromp di a malinforma publico riba e esencia di e contenido di un decreto nobo. No obstante cu a atende Lopez Tromp riba esaki, refiriendo na leynan vigente, POR a haya cu eminister a keda persisti den su maneho anuncia, exponiendo Pais Aruba na demandanan y posibel casonan innecesario den Corte y trece varios trahador den incertidumbre pa nan seguridad laboral.
Acusacion sin base
Den e carta dirigi na presidente di Parlamento, drs. Lopez Tromp a bisa cu e sentencia ta tocante mantencion y proteccion di flora, fauna y biodiversidad di Aruba. Pero ademas, e sentencia ta hopi relevante den e discusion cu a hiba den e Reunion Publico di dia 31 di Juli ultimo, cu tabatin como unico agenda ‘Kitamento di confianza for di minister di Ordenanza Teritorial, Infrastructura y Medio Ambiente,’ cu un parti ta basa riba e acusacion di e mesun miembronan di fraccion di POR contra e minister.
Pero e sentencia ta ilustra claramente cu FPNA, basa riba e landsbesluit Arikok tin e autoridad exclusivo pa trece limitacion pa locual ta acceso di UTV y ATV den e parke natural. “Huez a confirma cu ami como minister no tin un papel den esaki pa hunga. Tambe huez a bisa cu FPNA tin e autoridad pa determina acceso riba e camindanan sin mester consulta Cuerpo Policial di Aruba of DOW. Aki tampoco mi tin un papel pa hunga. Ami como minister ta para pa proteccion di naturalesa.”
No a mete
Otro cu locual partido POR y minister di Husticia y Seguridad mr Andin Bikker a trece dilanti , ningun momento Lopez Tromp, segun su opinion, a mete den asuntonan cu ta regarda cartera di su colega di partido y di gabinete, tampoco di minister di Transporte Chris Romero. “E decision pa no admiti ATV mas den Parke Nacional Arikok ta un autoridad exclusivo di FPNA y no di minister. Aprobacion di Conseho di Minister como tal tampoco ta bin al caso. Mas ainda, y awor ta confirma tambe, cu POR nunca mester a usa e argumento aki pa kita mi di mi funcion. Huez tambe ta comparti mi vision cu aki ta trata un asunto di FPNA y no di ningun minister,” Lopez Tromp a finaliza su carta.
Siguiente paso
Pues si esaki ta e base di e falta di confianza, anto huez a kita e argumento, segun e mandatario. E pregunta ta kico awor? Den un declaracion na prensa, Prome Minister Evelyn Wever Croes a bisa cu e paso awor ta den man di Marisol Lopez Tromp y cu e ta wardando riba esey.
E reaccion di Lopez Tromp tabata simpel: “Mi a cruza oceano pa bin e reunion di dia 31 di Juli, 2020. Mi ta wardando for di e anochi ey. Mi a sinta warda pa e di dos tanda y votacion. Ta nan a para e reunion.”
Y el a informa Prome Minister tambe cu e ta disponibel na tur momento, via zoom, email, telefon y whatsapp. Marisol Lopez Tromp a informa Secretaria di Conseho di Minister cu su vakantie ta te 14 di Augustus 2020, y el a avisa Parlamento. “Ultimo biaha cu nos a comunica, mi a informa Minister Presidente cu lo mi keda algun dia mas pa motibo di mi yiu. Mi a bolbe diabierna y segun mi cu esey no tabata un secreto. Ami tabata y ta semper disponibel pa comunica,” Minister Marisol Lopez Tromp a conclui.
