Ayera tardi, minister Marisol Lopez-Tromp a bay atende un reunion solicita pa Gobernador di Aruba, Sr. Alfonso Boekhoudt.

E reunion aki tabatin di haber cu e mocion di desconfiansa cu a wordo presenta diahuebs ultimo durante e reunion pa atende e tema di spearfishing. E mandatario a laga sa cu e no por drenta mucho den detaye di e reunion aki, ya cu reunion cu Gobernador di Aruba tin un caracter confidencial.

Tocante e mocion mes, el a bisa: “Ami ta sinti cu nan ta busca un meta pa baha mi cu un motibo cu no tin.” El ta kere cu si esaki ta nan intencion mester laga e decision aki den man di Gobierno mes pa medio di un decreto; y finalmente Gobernador mester firma e solicitud aki.

Ayera despues cu el a sali for di gabinete di Gobernador, e mandatario en cuestion a wordo confronta cu un declaracion di minister presidente. Esta den e caso aki y mirando e situacion cu surgi, minister Lopez-Tromp mester honra su mes y presenta su retiro. Minister di Infrastructura y Medio Ambiente a bisa cu e no tabatin mucho comunicacion ultimo dianan cu e prome mandatario. Diahuebs mes, ora cu Parlamento tabata bayendo pa e votacion, el a ricibi un mensahe di premier Wever-Croes tocante loke tabata sosodiendo den e votacion. Lopez-Tromp a pidi pa wak e reunion, ya cu e mes tabata den e proceso ey. Pero e prome mandatario tabata tambe den otro reunion, el a splica. Pero den henter weekend nan no tabatin contacto. Diahuebs tabata e ultimo dia cu nan tabatin comunicacion. Sinembargo minister a bisa cu te ayera tardi tambe el a ricibi un Whatsapp di Minister Presidente, pero na e momento ey e no a les’e ainda.

El a bisa cu tur hende cu ta conoce e procedura sa cu for di Status Aparte te awor, no tin niun ley cu a pasa cu 10-0. “E no por ta posibel,” el a declara. Ya cu mester ta e mita plus un, kiermen 11 hende por lo menos. E ta kere cu na final, esun cu lo bay dicidi pa pone su firma of no riba un decreto cu lo tin cu sali, supuestamente pa retira su persona como minister a base di e mocion di desconfiansa aki ta Gobernador di Aruba.

E ta haya cu den concepto di hopi experto huridico den reino Hulandes, e mocion di desconfiansa aki no ta uno valido ni corecto. Pero te ainda mester warda si e mocion aki lo wordo berdaderamente acepta of no. E mes a yega di ocupa e funcion di presidente di Parlamento pa 3 aña. E ta argumenta cu ta conoce reglamento di ordo di nos organo legislativo bon; pero tambe nos constitucion, pero tambe e ta conoce e procedura bon di votacion: Con pa vota, kico ta valido of no valido, etc… Pero e ta haya cu tabatin procedura no corecto na momento di e votacion riba e mocion di censura. Pero tambe riba esun di spearfishing, ya cu e por a mira esaki den detaye dor di e video. Pero tambe reino Hulandes por a mira cu e procedura aki no tabata corecto tampoco, segun minister Lopez-Tromp. E hecho aki a produci reaccion no solamente local sino internacional, vooral di politiconan di otro pais cu ta conoce e procedura aki.

Ora e mandatario a drenta pa atende e reunion cu Gobernador di Aruba, e tabatin cune dos file yen di documentonan. El a bisa cu tin cos cu e mester tene su mes di no divulga debi cu e tabata un reunion confidencia. Sinembargo el a bisa cu no ta secreto mas un carta cu el a presenta, caminda el a pidi Gobernador pa papia cune desde diahuebs siman pasa pa loke a surgi. El a pidi Gobernador diabierna si e por haya un cita pa atende e asunto aki. Loke el a duna di conoce el a vocifera tambe den e carta aki cu ta contene di su banda, con henter proceso den Parlamento a tuma luga. Un proceso cu el a cualifica cu no ta legal.

El a bisa cu un mocion di censura mester tin base di peso y no simpel suposicionnan pa retira un minister. Den su caso e ta haya cu no tin un motibo pa haci’e. Ademas pa loke tabata e reunion ultimo caminda lider di fraccion di MEP a presenta un mocion di censura contra su persona, Lopez-Tromp a bisa cu semper a duna su contribucion riba e topico di spearfishing, y tambe ariba tur otro reunion, el a duna su maximo cooperacion. Pa e mandatario no ta cuadra loke ta wordo bisa aworaki dor di cierto miembronan di Parlamento den prensa cu e no ta coopera, etc.