Actualmente prijs di vuelo Aruba- Corsou ta carisimo, esaki ta algo cu hopi hende ta keha di dje. Banda di esaki e cancelacionnan y atrasonan di vuelo ta un mal servicio cu tin hopi hende fada. Sinembargo no tin otro opcion di aerolinea pa bula cu ne.
Prijs halto y mal servicio
Segun Minister encarga cu transporte Otmar Oduber, pa loke ta trata Insel nos lo mester tin combersacionnan cu nan, pa mira atraso nan cu tin den vuelonan y cancelacionnan di vuelo. “Ultimo mi a tende cu prijsnan practicamente ta yega casi 600 florin pa bay Corsou, 700 florin pa bay Boneiro, cual no ta e intencion. E ora gobierno tin un tarea eynan. “A pesar cu gobierno no kier mete den funcionamento di companianan priva, pero mi ta kere cu si ta crea e ora, espacio pa gobierno por incentiva gruponan pa lanta y duna e competencia y servicio necesario na prijs rasonabel.”
Monopolio/gobierno
A puntra e mandatario kico gobierno por haci pa e prijs mirando cu e ta un compania priva y tin monopolio aworaki. El a splica cu lamentablemente competencia ta e unico cu por defini e prijs, pasobra na e momentonan aki y reglanan cu tin di tarifa ta indica, cu ora cu tin companianan e prjsnan mester wordo palabra y mester ta conforme ‘fair competition’. “Lamentablemente manera cu nos sa aworaki, ta un compania so ta sirbi e rutanan dentro di reino Hulandes e parti Caribense.
Aerolinea nobo
Tin informacion ta circula cu lo ta biniendo un aerolinea nobo. Minister encarga cu Transporte no ta na altura di ningun aerolinea nobo. El a bisa cu e sa di un compania cu ta ocupa cu su tramitenan pa logra un AOC, pero no sa con leu e ta cu esaki. “Nos ta duna bon bini na competencia, pasobra falta di competencia ta pone cu cierto momento prijsnan ta subi. Y ora un prijs subi, servicio ta baha, na momento cu no tin competencia. Como gobierno sigur nos lo keda fomenta competencia.”
Tiara
“Te ultimo cu nos sa Tiara tabata den combersacion cu partners pa purba yuda e compania, pero mas leu cu esey no tin informacion, Sr. Oduber a bisa.”
Falta piloto Insel
Banda di e cuestion di calidad di servicio tambe tin un situacion cu tin falta di piloto na Insel Air. E maneho cu nan a tuma ta encera, cu nan ta baha e rekisitonan cu e piloto mester cumpli cu ne pa e por bula e avion, pa asina tin suficiente piloto cualifica. Segun CBA (Curaçause Burgerluchtvaart Autoriteit) locual cu por of no por segun ley internacional, ta determina cu locual Insel ta haci no ta trece peliger pa e categoria di siguridad 1 cu tin.
Ferry
MIrando e situacion di monopolio cu Insel tin aworaki a puntra Minister si e ferry ta un bon opcion pa bin cun’e aworaki y el a bisa: “Mi mes tin diferente opinion pa loke ta e ferry, pasobra ferry ta bon pa nos local, hendenan cu kier viaha bay vakantie Corsou pa wak famia por ehempel. Pero nos mester corda cu den e 3 islanan, Aruba ta esun cu mas ta depende di turismo. Un turista Mericano por ehempel cu ta keda 7 / 8 dia Aruba, si e wordo brinda e posibilidad pa por bay hopi economico un otro isla. E beneficio den e caso aki ta pa e islanan cu no tin e bentaha turistico cu nos tin. Unabes cu e turista bay pasa 1 of 2 dia na Corsou y Boneiro, esey ta nifica cu e turista ta 2 dia menos gastando en e economia di Aruba. P’esey na difrente ocasion cu ta discuti asunto di e ferry, mi a bisa ora cu tin un Business Plan, ora tin un rapport traha riba e consecuencianan positivo y negativo di e ferry e ora mi lo duna opinion. Ferry ta bon y por baha prijs pa usuario pero mester corda riba e efecto di nos bishitantenan. Naturalmente kier comparti y kier ta partner turistico di nos islanan bisiña, pero na final e no por ta uno cu ta perhudica turismo di Aruba si”.
