E salario maximo pa cual Banco di Seguro Social ta cobrando prima na dunadonan di trabao pa e Fondo di Malesa actualmente ta 54.600 florin pa aña. E intencion ta pa subi e salario maximo pa 70 mil florin pa aña y pues amplia e grupo pa cual e prima ta wordo cobra y e grupo cu ta conta cu un seguro di enfermedad, den cual ta cubri salario pa e dianan cu no por traha.
Minister di Salud Publico, dr. Alex Schwengle y Director di SVB, Ir. Edwin Jacobs a splica siman pasa den Parlamento y despues a comparti e plan aki cu comunidad pa medio di un conferencia di prensa.
Minister Schwengle a splica cu e maneho di e fondonan na SVB Aruba, manera Fondo di Malesa, Cesantia y Seguro di Accidente, tabata consisti di move placa di un fondo pa otro. Esaki cu tempo no a yuda resolve e retonan di cada fondo riba su mes, pero mas bien a causa cu por ehempel cu e Fondo di Malesa a bay “den cora” y hasta tin su retonan pa paga dunadonan di trabao e primanan corespondiente na e dianan cu nan empleadonan bay AO.
E mandatario tabatin palabranan di elogio pa SVB mes pa nan analisis, proposicionnan y con nan ta maneha e fondonan, a pesar di e problematica cu ta conoci ya pa varios decada caba. El a splica cu e topico cu ta wordo discuti actualmente tabata originalmente parti di e dialogo social di 2013, pero a dicidi di concentra riba e cuestion edad di pensioen prome y a move e topico di Fondo di Malesa un banda temporalmente. Echo ta cu e topico no por keda mas den un status quo y ta necesario pa stabilisa e fondo y mantene sostenibel pa futuro.
Minister Schwengle a bisa cu e tempo ey caba a comparti tur informacion y tabata cla y raspa cerca tur partner cu mester sanea e fondonan. Den curso di diferente Gobierno a “schuif” placa di fondo pa fondo pa crea espacio pa nan maneho y asina a trece diferente fondo den peliger, y no por sigui padilanti asina mas.
Pression CAFT
E Minister ta lamenta cu e combersacion no a tuma luga na 2013 mes, pasobra awo ta asina leu cu e presion di supervision financiero di CAFT, unda cu no tin espacio mas pa no sanea e fondonan, pues tin un obligacion pa ley pa haci esaki.
E prima no ta cubri e gastonan y no por bisa “baha e uzo di AO”, pasobra avisa malo na Aruba di parti di sector priva ta sumamente abao caba. Hasta ora compara esaki cu nos region, pero tambe cu Hulanda, Aruba su sector priva tin un porcentahe di AO hopi abao den su sector priva.
Minister Schwengle a splica cu e fondo di cesantia tin un surplus hopi grandi y un suma di esaki lo wordo inverti, na un forma responsabel, pa yuda sanea e otro fondonan. A dicidi tambe, y ta spera pa haya aprobacion pa esaki, di aumenta e limite di salario, pasobra e otro alternativa, cual ta pa subi e prima no ta un opcion y lo afecta e grupo mas vulnerabel, segun Minister Schwengle. Pa medio di haci e grupo cu ta paga prima mas grandi, ta provee mas hende tambe cu e seguro social ora cu nan bira malo.
Loke Minister Alex Schwengle a exigi for di SVB for di un cuminsamento ta pa nan sugerencianan y conseho no traduci den un impacto grandi riba e esunnan cu ta carga esey. Aunke e aumento di limite di salario lo tin su impacto, esaki lo ta minimo compara cu si mester bin un aumento di prima, el a bisa. E bon noticia ta cu di parti di SVB e director a sigura cu pa 2020 e fondo lo ta sanea si haci e ehercicio aki entrante 1 di Januari 2016.
E titular di salud publico a remarca, cu ademas di sanea e Fondo di Malesa ta busca pa contene tambe e tendencia cu trahadonan cu ta cay riba di e limite di salario ta stop di tuma dianan di vakantie en bes di meld AO. Esaki socialmente no ta bon, pasobra hopi biaha nan no ta tuma AO pa miedo di perde nan trabao of pasobra nan no ta bon sigura pa cubri e dianan AO. El a subraya, cu si nan ta cubri pa SVB, lo e grupo aki por bay AO normal, consecuentemente lo nan uza nan dianan di vakantie pa e intencion original di dia di vacacion, esta pa relaha, recrea, haci algo pa nan mes y pasa tempo cu nan sernan keri.
Minister Schwengle a añadi cu e aumento pues di e limite di salario lo tin su beneficionan sigur pa e clase trahado. “Nos ta kere cu e plan ta un bon plan,” el a bisa. El a expresa cu e ta consciente cu e aumento di limite di salario lo por ta fastioso pa algun negoshi, pero e ta kere cu esaki ta alcansabel y deseabel, sigur pa parti di e pueblo y pa e fondonan por sigui padilanti cu un maneho duradero y responsabel.
