Ayera mainta, minister di Enseñansa, Ciencia y Desaroyo Sostenibel Armando Rudy Lampe a ofrece un conferencia di prensa pa duna di conoce un programa conhunto cu Qredits, cu desde 2017 ta ofrece servicio di microfinanciering a base di organisacion sin fin di lucro pa yuda empresarionan hoben local cuminsa nan mesun negoshi.

Esaki ta den e Programa Educacion Nacional 2030, den cual a anuncia cu e sistema di enseñansa mester ta dirigi specialmente riba mucha y hoben pa nan adkiri e ‘Twenty First Century Skills’ , hermentnan di competencia cu un ser humano tin mester den siglo 21 pa por sobrevivi; y un di nan cu ta birando hopi importante ta emprendimiento (entrepreneurship).

Ademas, Lampe a destaca cu mundo ta bayendo den direccion diferente di profesionnan tradicional cu tur hende ta conoce y cu cupo di trabou den e profesionnan aki ta birando menos. Mas y mas gobierno ta minimalisa su aparato y esey kiermen cu mas tin cu stimula pa e ciudadanonan mes cuminsa nan mesun negoshi y ta exitoso.

Di mesun manera, el a duna di conoce cu e siman aki a cuminsa na EPI e prome realisacion di e programa cu ta train docentenan di EPI, cu tambe lo cuminsa januari na 2020 pa siña studiantenan di e institucion aki pa ta den competencia di emprendimiento.

Lampe a bisa cu tin otro plannan pa sigui amplia loke ta e integracion di credit na programa educacional den e sistema di enseñansa.

Den e conferencia di prensa tabata presente Elwin Groeneveldt, director general di Qredits, Oliver Vieira responsabel di Qredits Aruba y Ryan Maduro director general di EPI.

Vieira a splica tocante e curso di Enseñansa pa Empleo, cu a cuminsa na september caba y a termina na december, den cual a duna e formacion aki, ora un di e studiantenan a caba di firma e prome credit na Qredits inspira door di e curso en cuestion.

Ademas, el a comenta cu den temporada di dos aña nan a logra mas di 150 credit pa yuda hende cuminsa cu nan mesun negoshi of pa haci inversion pa bay na e siguiente paso di nan negoshi.

Parti di nan participacion ta e programa di credit cu lo haci den scolnan di Aruba pa stimula y genera mas interes entre e hobennan pa loke ta trata emprendimento. Oliver a destaca cu esaki ta un topico importante y relevante pa locual ta economia y desaroyo di e pais. Hunto cu EPI lo kier haci e diferencia pa no solamente empresarionan, sino pa e muchanan tambe.

E programa di Enseñansa pa Empleo ta pa hende mas grandi, cu ta pafo di scol. Den esey tabatin un grupo cu a pasa door di e programa durante tres luna y despues cu nan a finalisa e programa, a haya e oportunidad di presenta un business plan di un cursista. Vu esey nan a logra di yega na un acuerdo pa financiamento.

Oliver a expresa cu locual el a mira na Aruba cu Qredits ta cu nan tin e trayecto pa haci e soño di un persona bira realidad. “Esey ta nos enfoke, nos forsa pa wak cu den corto plaso nos por haya e resultadonan caba”, el a comenta.

Tambe el a expresa cu nan ta keda pendiente di EPI, unda ta bay tin bon empresarionan hoben cu despues di caba nan trayecto di estudio, kier bay pa un negoshi pa nan mes of nan a siña e hermentnan di credit di emprendimento. Awendia tur compania kier pa e persona ta emprendedor, pa por lo menos pensa riba nan mes con nan ta desaroya y crece, y akinan Qredits ta hunga un rol.

Ryan Maduro, director general di EPI, a trece dilanti cu e programa a cuminsa un par di luna pasa. Basicamente loke nan a haci diamars pasa tabata e training di e programa riba su mes, cu ta prepara un grupo di docente pa nan tin e habilidad pa por duna les di credit. Un programa basta completo cu variacion di mercadeo, con e persona por hinca un plan financiero den otro, con por hinca e business plan den otro, con por haci un presentacion. El a sigura cu esaki ta un forma adicional cu EPI ta contribui na e Plan Educacion Nacional 2030.

Maduro a informa cu esaki ta un programa digital hopi innovativo, cu e docentenan a haya pa via di computer un certificacion y ta yuda pa e business plan. Na januari e programa lo bay ta den curriculum di EPI dirigi pa studiantenan, pa nan tambe tin e habilidad di innova, di bin cu cosnan nobo pa Aruba, pero di un forma structura. Tambe ta ofrece e otro programa pa publico y comunidad en general.