Minister di enseñansa, Rudy Lampe (RED) a declara durante un conferencia di prensa ayera nochi cu e noticia cu lo stop cu Middag MAVO su 2e y 3e klas ta ‘falso’. Esaki despues cu un studiante, cu fam Tucker, a declara na portal di noticia 24ora.com cu un juffrouw na lagrima lo a conta nan klas cu e minister a duna orden pa para scol y cu e studiantenan lo mester bay busca un alternativa pa sigui nan enseñansa.
Bon Dia Aruba a busca un reaccion adicional di e ministerio, mirando cu a menciona cu un docente lo a suministra e informacion aki na e studiantenan, cual mayormente tin 16 pa 18 aña, segun Tucker. A declara basta fuerte contra e minister, bisando cu ‘con bo (red. minister) kier pa hubentud bay dilanti anto bo tin hobennan riba caya awo sin por haci les? Ta papiando di stop di haci droga, stop di bebe y tur esey, pero awo ta pone studiantenan cu ta haci les riba caya’.
No a cancela Middag Mavo, sino pa 2e y 3e a cambia estilo di les pa uno ‘mas personalisa’
“Lampe a duna e declaracion pasobra e no tabata berdad. E juffrouw— e supuesto juffrouw— cu a informa nan, no lo a informa nan corecto. Lampe ta bisa hasta cu a prepara un lokaal ful, lokaal 41, pa e lesnan por sigui. E sistema di les lo cambia, e no lo ta e manera tradicional, pasobra Lampe ta di opinion cu si e muchanan a keda sinta mas cu un biaha caba, mester haci un esfuerso adicional pa yuda nan haal nan diploma. Cu e mesun sistema no por bay spera un otro resultado”, segun vocero di ministerio.
E sistema aki lo pone mas atencion pa cada mucha individualmente, cu meta pa percura cu e studiante lo por haal su diploma, e vocero a splica. ‘No ta conoci ken e supuesto juffrouw cu a duna e informacion ta, si ta berdad cu el a bisa esey, ni si ta berdad cu un juffrouw a bisa algo mes’, e vocero a duna di conoce. Awe lo mester a ta un atardi informativo, segun e vocero, unda ta splica e studiantenan con e sistema nobo ta hinca den otro, mirando cu tur cos ta cla pa cuminsa di biaha cu e manera nobo aki di acerca enseñansa.
