Durante un programa informativo di minister di Enseñansa, Ciencia y Desaroyo Sostenibel, Armando Rudy Lampe via su rednan social el a papia di varios topico. Un di nan tabata trata overtime di maestronan. Tambe a anuncia cu otro aña escolar, scol Dornasol lo cuminsa cu etapa secundario.

Lampe a informa cu siman pasa el a bishita dos scol, na cual el a ripara e situacion dificil cu e pandemia aki di Covid-19 ta creando y generando hopi efectonan. El a splica cu na e prome scol tabatin un caso di sospecha di un mucha cu a wordo abusa sexualmente na su cas; y na otro scol el a haya otro caso di un mucha cu ta wordo maltrata fisicamente.

Di esaki, minister Lampe a comenta cu esakinan ta indicacion di e problemanan social y emocional cu ta birando cada dia mas grandi na Aruba.

Crisis di pandemia Covid-19 ta bin no solamente cu problemanan financiero, manera minister Lampe a afirma, pero door di esey mes ta pone stress riba hopi famia. “No ta un situacion facil pa maneha”, el a sigura.

Ademas Lampe a trece dilanti cu su ministerio a scucha Sindicato di Maestro (SIMAR) pa loke ta trata un problema cu a surgi pa pago di overtime. Ademas el a informa cu nan ta bezig resolviendo pa nan por cumpli cu e malcontento cu a surgi siman pasa bao di cuerpo di maestro di colegio San Nicolas.

Lampe a bisa cu nan splica e sindicato cu e procedura mester ta cu prome ta haya aprobacion di inspeccion di enseñansa pa e tareanan di un maestro y despues e administracion di scolnan publico lo mester wak si ta di acuerdo cu e maneho di minister di Enseñansa, unda cu nan ta purba di bin cu un maneho di control financiero, pa nan por garantisa pago di salario di tur maestro.

“Nos no kier yega na un situacion manera Grecia unda cu na dado momento a pasa den un crisis similar cu no tabatin likides”, minister Lampe a bisa.

Tambe el a duna di conoce cu siman pasa tabatin e bishita di consul general di Merca, ken a bin Aruba unicamente pa wak e edificio di John F. Kennedy Center. Di esaki, Lampe a menciona cu departamento di Estado y Gobierno di Merca a promove estudionan na Merca y p’esey a habri mas di 150 centro di educacion rond di mundo, di e cual Aruba ta e prome na Caribe Hulandes, cu a habri un centro di educacion U.S.A – Aruba.

Despues cu nan a firma un acuerdo di cooperacion entre nan ministerio, Gobierno di Aruba y departamento di Estado di Gobierno di Merca a compromete nan mes di duna training pa nan personal, personal informativo y computer disponibel, na unda ya nan cuminsa atende hende cu tin interes pa studia na Merca. “E consul general a expresa palabranan di elogio pa Aruba, cu na un forma asina rapido y den crisis tabata sa di actua y habri un centro cu ta atende publico”, Lampe a expresa.

Di mesun manera, minister Lampe a anuncia cu scol Dornasol – un institucion specialisa pa muchanan cu tin indicacionnan medico of cu mester di un atencion hopi special – a haya reconocemento di Hulanda, na unda ta atende muchanan cu ta rekeri atencion special. Ademas Lampe a anuncia cu pa otro aña escolar, scol Dornasol lo habri cu enseñansa secundario.

“Aworaki e ta completo pa un institucion cu tabata haci falta na Aruba”, el a menciona.

Tambe Lampe a reacciona tocante algun pregunta cu comunidad a trece dilanti. Un di nan tabata trata di colegio San Nicolas, na unda tin cu presencia di 100% di alumno; pero servicio di transporte publico no ta cubri tur ruta y muchanan ta hayando problemanan pa bay cas back despues di scol. Di esaki minister Lampe a manifesta cu nan ta purbando pa muchanan no ta 100% fisicamente na scol y esunnan cu no ta atende scol por haya nan les di manera online.

El a conta cu ya nan a caba cu e tramite di pago di e material educativo online cu ta dirigi pa HAVO y MAVO, por ehemplo, na unda a pone material disponibel pa esnan cu ta den nivel basico di scol di San Nicolas no perde nan les y sigui esey bao guia di nan maestronan di manera online.

Di otro banda, el a anuncia cu pa landsexamen HAVO, unabes cu nan a termina cu e tramite di material educativo, tur esey lo ta disponibel pa esunnan cu ta pidi e servicio pa landsexamen aki. Mirando cu usando e material online, muchanan mes por prepara pa nan landsexamen.

Si tin personanan cu mester di dispensacion pa via cu a keda sin trabao of a perde otro entrada, minister Lampe a bisa cu nan mester haci e peticion ey pa wak kico por haci y asina por yuda e persona pa haya su diploma.