Despues di un reunion maratonico den Parlamento diamars den dia y anochi, unda ministro encarga cu enseñansa dr. Rudy Lampe a defende su maneho, a termina e sesion cu algun mocion, di cual esun di desconfiansa tabata esun mas importante.

Manera tabata di spera, e mocion entrega di parti di oposicion no a haya apoyo di e partidonan cu ta sostene e gobierno di coalicion. Esey no tabata implica cu no tabatin critica y preocupacion tambe di parti di e parlamentarionan di banda gubernamental.

Di banda di e mandatario el a mustra riba varios situacion cu ta requeri accion di su banda. Tin varios situacion n ascol unda cu no tin suficiente alumno pa hustifica subsidio di gobierno, y segun e ministro su maneho mester ta pa resolve esakinan.

Parti grandi di e critica, di ambos banda, no tabata e desacuerdo tocante e necesidad di cierto cambio y innovacion, sino mas bien e velocidad y e cantidad di cambio cu e mandatario ta desea di implementa den poco tempo. Tin preocupacion grandi riba e introduccion acelera di enseñansa online por ehemplo, mientras cu tin duda si e situacion ta apto pa haci esaki, sin cu e recursonan ta disponible, entre otro. Di otro banda e situacion actual ta asina cu di mes e medidanan cu mester tuma na e scolnan ora nan habri ta obliga na tin solamente un parti di e muchanan na scol. Esey a hiba por ehemplo na e idea pa e muchanan di scol basico bay scol dos dia pa siman so, y e demas dianan haya les online. Pa e proximo aña escolar e imagen ey no ta cambia tampoco.

Scuchando e preocupacionnan, e ministro a haci e compromiso cu e ta bay dialoga cu esnan envolvi den e plannan cu e ta propone. Sin embargo, e no a expresa disposicion pa para e proceso pa loke ta ehecucion di esakinan. Despues di e dos tandanan di debate, e votacion riba e mocion di desconfiansa a duna e resultado anticipa, unda solamente e representantenan di oposicion a vota pro. Cu esey e ministro a keda ileso, sin embargo e problemanan den enseñansa ta leu di ta resolvi, tambe pasobra e recursonan no ta disponible y e dialogo priminti lo mester tuma lugar ainda.