Minister Lampe ta pidi SKOA: Coregi nombramento di trahado como ambtenaar sin base legal

Pa minister di Enseñansa, Rudy Lampe, directiva di stichting SKOA, mester coregi e impasse cu a surgi cu un grupo di nan trahadonan cu a haya e status di ambtenaar ilegalmente.

Igualmente el a aclaria cu e trahadonan aki nan trabou no ta core peliger y nan salario ta wordo garantisa pa via di e subsidio cu gobierno ta entrega na e fundacion aki. “Nos no ta kita niun hende di trabou,” el a bisa.

Sinembargo e mandatario a declara na Bon Dia Aruba cu nan no ta descarta cu eventualmente gobierno lo confronta un caso den corte relaciona cu e situacion aki. Si esaki lo tuma luga logicamente gobierno lo respeta decision di hues al respecto. Pero e ta haya cu den su funcion como minister di Enseñansa, e mester carga su responsabilidad y mustra ora algo a bay contra ley.

El a bisa cu esaki no ta algo excepcional, sino cu a cada rato nan ta topa situacionnan di gobierno anterior cu no a tene cuenta cu nos estado di derecho. P’esey e kier mustra esaki na SKOA como dunado di trabou cu full e proceso di nan trahadonan cu a haya status di ambtenaar no a cana conforme ley. Esaki ta nifica cu mester busca e forma pa coregi esaki.

Situacion.
El a splica cu for di 2015 -tempo cu ex minister Michelle Hooyboer-Winklaar tabata encargo di e ministerio di enseñansa den gobierno anterior- a wordo crea e situacion aki.

El a duna media un copia di e Ministeriele Beschikking (MB), caminda den e caso specifico aki, SKOA como dunado di trabou a cuminsa duna algun trahadonan encarga cu limpiesa y mantencion di nan scolnan, e status di ambtenaar.

Pa medio di e MB aki riba punto tres a wordo dicidi ‘contra ley’ –segun minister Lampe- cu for di 2015 e gastonan di e trahadonan (werksters) di SKOA ta wordo tuma bou e subsidio di SKOA. E decision aki a causa un situacion cu gobierno ta purba di resolve cerca SKOA. Ya cu e fundacion aki a cuminsa duna e trahadonan di limpiesa un status di ambtenaar.

E mandatario a bisa cu e personal cu ta haciendo e trabou importante di limpiesa den scolnan ta cay bou gastonan di explotacion. Gobierno ta subsidia tur directiva di e fundacionnan encarga cu scolnan pa loke ta gastonan di explotacion y nan lo continua subsidia e gasto aki. Y esnan cu ta realisando e trabou di limpiesa lo continua cu nan entrada basico.

Sinembargo for di 2015 y sucesivamente -segun e mandatario- SKOA tabata duna e trahadonan encarga cu limpiesa di scolnan, incluso otro trahadonan cu no ta cay como personal di enseñansa, un status di ambtenaar. El a bisa cu e tipo di nombramento aki no a pasa e procedura legal. Ademas si bo ta mira e cantidad di trahadonan cu SKOA tin compara cu e otro directivanan di scol, e minister ta haya cu e ta algo desproporcional.

Igualmente minister Lampe a bisa na e matutino aki cu departamento di Recurso Humano (DRH) absolutamente no tabata envolvi den e nombramento di e trahadonan na servicio di SKOA cu a haya e status di ambtenaar. El a afirma cu esaki ta un procedura contra loke ta un exigencia di un estado di derecho.

Pa bo por bira ambtenaar bo mester tin conseho di DRH, unda entre otro ta wordo evalua si tin vacatura of cualkier otro situacion laboral den gobierno. Ademas e nombramento mester bay conseho di ministro y despues oficina di Gobernador pa e persona nombra y por haya su status di ambtenaar. “Nada di esey no a wordo haci,” el a bisa.

Instancianan di gobierno -den nan conseho huridico- a señala cu e nombramento haci den SKOA ta contra ley. P’esey e ta pidiendo pa coregi esey. E problema a surgi na APFA, ya cu ora bo ta bay pa bira miembro di e fondo di pension aki, APFA ta controla si bo tin documentacion cu ta mustra entre otro cu bo a wordo nombra como ambtenaar pa medio di un decreto gubernamental.

Segun e mandatario, e trahadonan aki na servicio di SKOA a wordo remiti na APFA, sin cu nan tin e documentacion corespondiente. “P’esey nos ta pidi SKOA como dunado di trabou pa coregi e situacion aki,” el a bisa.

Segun minister, actualmente nan ta den dialogo cu SKOA y cu APFA pa coregi e situacion aki. “Pasobra bo no por continua sin un base legal den status aki,” el a bisa.

Desigualdad.
Minister Lampe kier a trece trankilidad na e trahadonan aki bisando cu nan futuro laboral y nan salario no ta den peliger, pasobra gobierno ta continua cu e subsidio destina pa gasto di explotacion, manera tur otro directiva di scol ta hayando aworaki.

E no kier crea tampoco un desigualdad of discriminacion, ya “tur stichting di scol ta wordo trata igual,” el a bisa. Pues e ta haya cu a wordo crea un situacion desigual entre SKOA y otro directivanan di scol. Mientras cu aworaki tur mester haya e mesun trato igual.

Segun e mandatario a wordo haci promesa falso na 100 persona pa bira ambtenaar, sin tin un base legal pa esey. Nan mester coregi e situacion aki ya cu no por bin discriminacion cu otro directiva di scol cu ta hayando gasto di explotacion.

Ademas el a trece dilanti cu gobierno tin palabracion cu e colegio di supervision financiero (CAft) a base di e protocol cu nan a firma cu Hulanda pa loke ta e bahamento di gasto di ambtenaar y tambe e personeelstop den sector publico.