Segun minister di Enseñansa, Ciencia y Desaroyo Sostenibel, Rudy Lampe, locual ta wordo yama como Prins Bernhard School no ta un scol, ni publico tampoco priva. Sino cu e ta djis un programa di un aña cu ta wordo duna na muchanan y hobennan migrante cu nan mayor a bin establece na Aruba.
E mandatario a probecha pa anuncia un cambio den e programa aki. Gobierno a firma un acuerdo di entendimento(MoU), entre ministerio di Enseñansa cu un programa di Departamento di Estado di Merca. Recientemente nan a ricibi bishita di e Consul General di Merca na Aruba pa concretisa e acuerdo aki pa un centro di educacion virtual na edificio renoba di JFK Education Center .
Tambe el a bisa cu mayoria di e docentenan cu ta duna les eynan ta pensionadonan, y nan ta cay den e grupo di riesgo, y tampoco nan por desaroya un programa cu ta depende di pensionadonan. Diasabra awor e lo bay topa cu e team di Prins Bernhard pa sigui dialoga cu nan.
Igualmente el a bisa cu nan a papia cu e tres docentenan di DPS cu tin den Prins Bernhard. Nan lo sigui cu nan funcion nobo denter di nos sistema di enseñansa Hulandes. Mientras cu e alumnonan lo ricibi enseñansa virtual pa medio di un programa di enseñansa bilingual.
E mandatario a declara na Bon Dia Aruba cu e aña aki un total di 222 alumno ta clausura e programa aki. E programa aki ta dividi, un parti ta mainta y otro mita ta bin atardi. E dos programa aki ta abarca e cantidad di 222 alumno, pero e demanda ta grandi. Di e total aki un grupo di 77 lo bay EPB. Un grupo chikito ta bay MAVO. Pero tin un cantidad grandi di nan cu despues di termina e programa aki no tin un continuidad den nan enseñansa pa nan. P’esey e ta cualifica cu e programa aki tin su deficiencia.
Minister Lampe ta kere cu e cambio pa e sistema nobo aki lo trece beneficioso pa ofrece nan e diferente facilidad di enseñansa cu nan kier scoge na Spaño y/of Ingles. Nan ta ofrece e vak di Hulandes tambe como un opcion denter di e programa aki.
Nan por studia desde basico te hasta bay universidad mes. El a splica cu e programa ta un curriculum online reconoci internacionalmente. Despues di termina e programa bo por bay cualkier universidad na Merca y hasta na Europa.
Dor di e sistema aki tin organisacion internacional cu ta calcula cu e cantidad di muchanan migrante indocumenta na Aruba ta mas grandi di loke nos ta kere. E intencion ta cu mas mucha no solo migrante sino local por beneficia di e sistema aki. Ya cu tur mucha tin derecho na educacion caminda nan ta haya un diploma reconoci.
