E intencion cu minister di Enseñansa, Rudy Lampe (RED) tabatin pa bin cla den transcurso di e aña aki cu e proceso di cambio di scolnan publico pa un fundacion, no ta asina mas. E ta haya prudente pa aplasa su intencion inicial di pone na vigor e independisacion aki entrante 2019.

Te hasta e lo reconsidera su intencion di bin cu e cambio aki den caso cu e docentenan y trahadonan di Dienst Publieke Scholen (DPS) ta contra di dje. “Si maestronan efectivamente bisa cu nan no kier bay den e direccion aki, nos t’ey pa obedece e pueblo”, el a declara durante un conferencia di pensa na Bestuurskantoor ayera mainta.

Pero si e minister Lampe a laga sa cu ‘nan lo continua cu e prome paso di independisacion di scolnan publico cu scol EPI’. E consulta lo cuminsa cu scol EPI pa nan por yega na un trayecto di un fundacion entrante dia 1 di januari 2019. El a bisa cu for di EPI el a haya un peticion cu firmanan pa bay den e direccion di un fundacion EPI. Den cuadro di independisacion aki, e ta pidi e docentenan y trahadonan di otro scolnan publico pa keda trankil, ya cu no ta bay tuma niun cambio pa e momento.

Mas deliberacion
Ayera den un tono mas conciliando, e mandatario a reconoce cu nan mester di mas tempo pa sigui delibera cu e maestronan pa kita tur duda y sigui splica mas riba independisacion di scol publico. Segun e minister, caminda tin hopi duda bou e maestronan ta necesario pa atende tur duda y confusion cu tin. Esaki tabata e duda cu e docentenan a yega di expresa durante e reunion cu e mandatario a sostene cu e sindicatonan SEPPA y SIMAR cu ta representa e trahadonan aki. E mandatario ta considera un deber di atende debidamente cu nan y no laga niun duda atras.

El a cualifica como ‘informacion incorecto’ tur loke ta circulando rond di e topico aki. P’esey el a dicidi cu pa e momento pone ‘hold on’. Un di e critica den direccion di e mandatario tabata cu e kier a impone e cambio aki di un forma dictatorial. Tambe cu e cambio aki ta perhudica e trahadonan y docentenan di DPS nan posicion huridico.

Minister Lampe a laga sa cu e asunto aki no ta posibel, ya cu e posicion huridico di e docentenan ta parti di nos ordenansa huridico y hues por faya contra gobierno. “Ta imposibel cu nos kier haci algo den contra di nos maestro”, segun e mandatario.

Pero el a considera cu ta hopi importante pa nos maestronan por traha den tur trankilidad. P’esey e ta spera cu awor cu nan ta bay tuma mas tempo. Pa asina tur maestro efectivamente lo por sinti mas trankil cu di parti di gobierno no ta impone e cambio aki. “Pa nada di mundo nos no kier touch posicion huridico di niun maestro”, el a bisa.

Igualmente e mandatario a nenga cu e por ta na altura di un carta di Departamento di Recurso Humano (DRH) caminda nan ta desconseha pa bin cu e cambio aki. Pero si minister Lampe a tende cu SEPPA a haya un conseho huridico cu ‘ta duna nos rason’. Sinembargo e conseho aki no a wordo atendi ni publica. E ta haya cu ta existi un ambiente di rumor pisa rond independisacion di DPS. P’esey e ta prefera di bin cu un periodo di consulta.

Pa esunnan cu kier hinca e asunto aki den un skina politico, minister Lampe a recorda cu e tema aki partido AVP a bin cu esaki no awor sino 30 aña pasa. Tambe partido MEP bou gobierno di ex-prome minister, Nelson Oduber a bin cu e prome fase di independisa scolnan publico. P’esey e ta haya relevante pa tanto parlamentarionan di AVP y tambe di MEP por splica awor pakico nan a cambia di opinion.