Recientemente Minister di Enseñansa Rudy Lampe a expresa su satisfaccion cu e acuerdo cu a ser firma entre EPI y Hospital. E acuerdo aki ta duna studiantenan e oportunidad pa cuminsa cu un opleiding pa por traha na Hospital.
E studiantenan ta cuminsa e prome 2 añanan na EPI y despues ta sigui pa e di tres aña cu “training on the job” kier men, na Hospital mes di cual 1 dia di siman ta dedica na teoria y e resto ta practica.
Segun e comunicado cu Bon Dia Aruba a ricibi a indica cu esaki ta e practica y modelo cu Gobierno di Aruba ta kere aden cual a duna tambe su prome resultado positivo. E studiantenan cu a caba e curso aki ta ful capacita pa traha na Hospital. Minister di Enseñansa ta felicita e graduadonan y esunnan cu a participa den e estudio aki “Hospital Academy” hunto cu EPI.
“Esaki ta un iniciativa mas di Gabinete Wever-Croes mustrando claramente den ki direccion e Gobierno aki kier bay pa loke ta ‘beroepsopleiding’”, Minister Lampe a expresa.
