Minister di Enseñansa Rudy Lampe (RED) a splica den un conferencia di prensa cu e decision pa transforma Dienst Publieke Scholen (DPS) den un fundacion lo no afecta den ningun manera e posicion di docentenan.
E conferencia cu sr. Lampe a yama tabata pa toca e preocupacionnan cu a surgi despues cu rumornan a cuminsa circula cu e mandatario lo ta separando DPS di gobierno pa asina corta gasto di gobierno cu consecuencia cu docentenan lo perde nan status como ambtenaar.
“No tin nada di haber cu corta gasto ni cambia admision pa studiante. Nada di esaki ta e intencion di e cambio aki. E unico intencion ta pa limita e poder di e minister pa regla maneho diario di scolnan publico. P’esey mi a bisa e intencion ta noble. Pasobra ora un mandatario tuma stap pa limita su poder pa bienestar di calidad di enseñansa e ora ey esey ta di aplaudi.”
E cambio aki ta encera independisacion di enseñansa publico, por medio di crea un fundacion cu lo ta encarga tur e asuntonan diario di e scolnan. Esaki segun sr. Lampe no kiermen cu lo tuma distancia di DPS of otro fundacionnan cu ta maneha scol y lo ‘sigui ricibi tur apoyo di gobierno’. E Stichting Openbaar Onderwijs aki lo eherce control riba directiva di scolnan publico. “Pa loke ta trata e maestronan cu ta traha pa scolnan publico esaki no lo afecta pa nada nan condicion laboral. Pasobra e fundacion aki lo ta 100% di gobierno tampoco lo afecta e admision di alumnonan.”
Tumando nota di diferente critica riba medionan social, nos a puntra minister di enseñansa dicon no a consulta cu sindicato di maestronan SIMAR pa loke ta trata e cambio aki. Sr. Lampe a splica cu esaki tabata un cambio cu nan a campaña cu ne como partido RED pues esaki no tabata algo cu a bin inesperadamente. “Mi no ta eherciendo un capricho di mi, mi ta ehecutando loke e pueblo cu votado a pidi di mi.”
Sr. Lampe a finalisa bisando cu nan lo kier pa Stichting Openbaar Onderwijs sirbi como un ehempel pa e resto di e fundacionnan por medio di wordo di maneha pa profesionalnan.
