Ayera minister di Enseñansa, Ciencia y Desaroyo Sostenibel, Rudy Lampe a referi na e tema di actualidad den mundo henter, despues cu Organisacion Mundial di Salud a declara e coronavirus como un pandemia.
Minister di Enseñansa a presenta e plan pa nos sistema di enseñansa referente cu e coronavirus, caminda nos mester ta ‘alerta y prepara’, pero sin cay den panico, segun e mandatario.
El a laga sa cu e ta den contacto cu demas coleganan di departamento di enseñansa di Bonaire y Corsou, pa asina sostene otro y siña di otro pa conhuntamente confronta e reto aki. El a invita tur maestronan y mayornan pa bishita departamento di enseñansa su website: ea.aw caminda nan ta haya tur informacion actualisa y plan integral pa loke ta nos scolnan.
E prome punto importante cu e mandatario a resalta den e plan aki ta e prevencion cu ta inclui diferente aspecto pa nos scolnan, entre nan higiena. E ta pidi pa stimula nos muchanan pa laba man constantemente, no solamente den scol, sino na cas tambe. Igualmente pa nan ta cauteloso cu e uzo di e cooler pa no bebe directamente e awa, sino pa nan uza nan cup personal.
