Pa e balor simbolico di 1 florin, e institucion Hulandes TNO Caribbean a haci entrega di tur su instrumentonan costoso di investigacion na Associated For Sustainable Development For Caribbean (ASDC), poniendo asina un final na su relacion cu gobierno di Aruba y su presencia di 5 aña riba nos isla.

A oficialisa e hecho aki cu e firma di un acuerdo cu presencia di Minister di Enseñansa, Ciencia y Desaroyo Sostenibel, Rudy Lampe. Tambe tabata presente Jossy Laclé, kende a forma parti di e grupo di maneho di TNO Caribbean y Robby Croes, kende ta forma parti di e team di Lampe.

“Nos ta hopi gradicido pa e gesto solidario aki di parti di TNO, y loke e ta laga atras pa Aruba,” el a bisa.

TNO su frutonan.
Ya caba gobierno di Aruba a yega di anuncia cu no lo renoba e contract cu TNO Caribbean tabatin cu pais Aruba. E decision aki a wordo tuma den Conseho di Minister na luna di mei 2018. Sinembargo gobierno a dicidi di honra e acuerdo cu gobierno anterior a firma cu e institucion aki y cu ta caduca fin di aña aki.

Como Minister di Enseñansa, Ciencia y Desaroyo Sostenibel, Rudy Lampe a tuma e tarea di dispidi formalmente di e director di TNO Caribbean, Sjaak van Loo. Tambe den nomber di minister president, cu no por tabata presente, el a expresa palabra di gratitud pa TNO su contribucion na Aruba. El a cualifica e relacion aki como uno ‘fructifero’. Durante henter un lustro nan contribucion y aporte tabata valioso riba tereno di desaroyo sostenibel. TNO ta un institucion di ciencia aplica di Hulanda, el a bisa.

E mandatario a reconoce cu e acuerdo cu TNO tabatin su frutonan y uno di nan, evidente y importante, tabata e proyecto di ‘Smart Community’ na Kibayma. Nan a crea un comunidad cu ta conta cu e principionan di desaroyo sostenibel. E ta pas den cuadro di e compromiso di henter mundo pa cumpli cu e metanan global di desaroyo sostenibel (SDG) pa 2030. E mes como minister encarga cu e cartera di desaroyo sostenibel a hinca den otro e proyecto di Smart School, teniendo na cuenta e consehonan di e profesionalnan di TNO.

Otro tipo di relacion.
Igualmente el a elogia e hecho cu TNO Caribbean a laga un legado den e formacion y capacitacion di un grupo di colaboradonan profesional local di TNO cu lo tuma over e tarea di e institucion aki, pero bou otro nomber, esta Associated For Sustainable Development For Caribbean. Segun Lampe, esaki ta habri otro tipo di relacion of ‘capitulo nobo.’

Den esaki gobierno ta bay mira e capitulo nobo cu ta bay cuminsa pa loke ta e cooperacion cu a inicia cu TNO. E ta kere cu e formacion di recurso humano ta e miho legado di loke TNO ta laga atras.

“Esaki ta otro legado di TNO. E formacion cu el a nifica e ultimo 5 añanan. Forma nos profesionalnan local den e principionan aki,” e mandatario a declara.