‘Negacion a base di formalidad ta na caminda pa bira algo di pasado’. Esaki minister di husticia, siguridad, stranheria, Andin Bikker (POR) ta bisa.
E manera cortes cu Dimas ta cera porta legal pa personanan cu tin añanan bibando riba nos isla ‘mester por stop’, segun e mandatario. E ta agrega cu e problema ta un producto di e mandatario anterior su ‘rutina’ di firma tur papel cu presenta su dilanti. Sinembargo tin indicacionnan cu e problemanan aki ta bin di paden Dimas su edificio mes.
Ayera na un conferencia di prensa e minister a publicamente adresa e practica di Dimas pa otorga 4 of 5 permiso sin problema– pa despues drey nenga un permiso. Asina kibrando e enlace entre documentonan cu ta duna personanan derecho pa bin na remarca pa e nacionalidad Hulandes y asina e paspoort cora scur tambe.
Sr. Bikker a expresa cu e transicion cu Dimas tabata den dje pa loke ta trata instalacion di e sistema pa automatisa cual tabata un inversion di mas o menos 2 miyon florin a crea hopi discrepancia na e departamento. E minister ta spera cu e malesanan di infancia cu e sistema a experiencia lo cura pronto, cual director di Dimas Kathy Paskel Ruiz tambe a yega di adresa den pasado.
E fenomeno di nenga permiso number 5 y 6 cual ta simplemente un prolongacion formal den un persona su trayectorio ‘ta casonan inhusto’ sr. Bikker ta bisa. Y p’esey tin cosnan andando pa entre otro por otorga permisonan cu meta di estadia largo pa mas cu 1 aña. E problema aki te hasta ta haya diferente cara: segun e minister ta notabel cu permisonan otorga tambe tin tendencia pa schuif pa via di ‘paper pushing’ cual ta crea buraco den estadia por medio di entrega e permisonan laat.
“Tur e dolor di cabes ey ora un permiso ta crea un buraco chikito asina complicando caminda pa haya nacionalidad lo nos kier pa pasa pa pasado.” Pero no ta asina cu lo bay laga cualkier hende drenta facilmente, segun sr. Bikker. Mirando e situacion na pais bisiña Venezuela, Aruba lo tin cu ‘para fuerte’ y no admiti personanan cu no tin derecho riba esaki.
Studionan huridico
E minister ta indica cu actualmente ta haciendo studionan huridico pa por haci posibel otorga personanan cu a biba pa tempo largo na Aruba un caminda pa haya nacionalidad despues di haya buraco pa via di e propio sistema cu lo mester a legalisa nan.
Un di e maneranan cu ta spera di por realisa esaki ta por medio di otorga un permiso di estadia indefini, esta firma liber, cu ta duna derecho riba estadia retroactivo pa un periodo di te 10 aña den pasado. Asina lo percura pa personanan den ‘limbo burocratico por haya nan nacionalidad’, segun sr. Bikker. Esaki no ta nada nobo. Sr. Bikker a señala bek na un poco tempo pasa ora cierto personanan cu a haya nacionalidad Hulandes na Aruba a resulta di nunca a obtene esaki pasobra nan a haya esaki por medio di pariente. “Nos a sinta den reunion parlamentario di Reino (IPKO) e tempo ey pa bin cu un manera pa otorga un tal permiso cu ta habri porta pa personanan residencia pa mas cu 10 aña na nos pais haya e nacionalidad bek.”
“Bin cu algo asina tin basta precedente mirando cu tin personanan cu a biba pa mas cu un decada na nos isla y pa via di tin un buraco te hasta di 1 siman entre permisonan nan no ta bin na remarca pa nacionalidad Hulandes. Esaki den mi opinion ta inhusto.”
Sr. Bikker a expresa di kier bay acerca e solucion pa e problema aki di manera responsabel, pero mester reconoce cu e problema paden di Dimas ta bay mas leu cu ‘cierto practica’ di minister anterior. E mandatario p’esey kier kita e pensamento cu ora tin problemanan cu permiso por pasa e mandatario di stranheria libremente ‘manera e tabata haci na su cas’. Sinembargo cuanto di e decisionnan negativo ‘di formalidad’ cu minister a señala no ta pasa dentro di departamento mes?
Clientenan malcontento
Tin algun personanan cu a bin dilanti na nos redaccion den pasado pa señala discrepancianan den proceso pa obtene permisonan. Un di e personanan aki su storianan nos a publica aña pasa den juli. E persona aki a expresa cu hopi biaha Dimas mes ta crea un buraco den estadia por medio di haci slordig cu papeleo. “Cu mi nan a haci un fout di rechasa mi pasobra nan a kere ami ta mi ruman.”
Pero awo tambe un otro persona a bin dilanti señalando cu Dimas a rechas’e riba su peticion recien. E persona, kende a opta pa keda anonimo a conta nos y a comparti documentonan cu ta mustra cu Dimas no a sigui e proceso di Lar. E persona a mustra cu en berdad despues di haya un rechaso a entrega un carta di obhecion (bezwaarschrift) cual Dimas no a sigui riba dje. E departamento en bes di sigui e trayectorio legal di LAR a simplemente otorga e permiso.
Aunke esaki tabata na fabor di e persona, esaki ta mustra cu tin cosnan cuestionabel pasando na Dimas, e persona anonimo a expresa. Nos redaccion a haya copianan di e persona su documentonan den e caso aki, pero no lo publica esaki innecesariamente. Sinembargo e persona a autorisa nos pa por mustra nan si kita informacion personal manera nomber y CRV#.
‘Soñonan kibra’
Un otro persona cu a bin dilanti a conta nan storia creciendo na Aruba y djey confrontando despues cu a biba pa basta tempo na Aruba cu no lo ta facil pa bay sigui studia mirando su situacion legal. Es mas, e hoben kende tambe a opta pa keda anonimo a splica cu aunke e permiso di estadia indefini firma liber cu el a haya den cuadro di proyecto Dreamers ta un ayudo pe, e ta sinti cu ‘ta tristo pa keda na Aruba y mira mi amigonan bay un pa un mientras ami ta keda’.
E hoben a conta nos redaccion con el a haya su mes par di aña enfrenta cu un miedo pa autoridadnan na inmigracion ora esakinan a presenta na su trabou. E hoben cu a bin Aruba cu 2 aña a splica cu esaki no tabata pasobra e tabata ilegal, si no cu ‘Dimas tabata tarda pa tuma decision’. “Mi ta sinti mi mes manera Arubiano. Sinembargo mi a haya un teror pa wordo gara pa inmigracion. Mi ta spera cu pa compronde e situacion di personanan cu a crece na Aruba pero cu a haya buraconan den estadia hende cu ta sinti nan mes como Rubiano cuminsa reflexiona: bo ta imagina bo mes cu miedo pa inmigracion den bo propio pais?”
Nos lo elabora mas riba e persona anonimo su storia den un proximo edicion. Ambos nomber di personanan anonimo ta conoci pa nos redaccion.
