WILLEMSTAD – E minister di tráfico, Zita Jesus-Leito ta haciendo tur lo posibel pa mehora e transporte publico. E obhetivo ta pa aumenta e uzo di transporte publico di 10% pa 20% , pa e motibo aki a organisa un “kick-off meeting” dia 29 di april ultimo.
“Na e momentonan aki, e 10% di e poblacion ta uza transporte publico, ta trata di entre 14 mil y 16 mil persona.” Mobilidad ta hopi importante pa e funcionamento di e economia. Tur hende kier tin e posibilidad di ser mobil. Sinembargo, e investigacionnan ta mustra cu tin problema cu trafico y siguridad di trafico”, e minister a bisa.
“E obhetivo ta pa establece un bon sistema di transporte publico pa cual ABC Busbedrijf y e autobusnan chikito mester funciona miho y traha hunto y ser accesibel den tur bisindario. Ademas ta importante cu transporte publico no solamente ta economico sino tambe confiabel, comodo y accesibel.”
Actualmente tin cooperacion entre gobierno, ABC Busbedrijf y e sindicatonan di transporte STU y STO, oficina di turismo di Corsou CTB y Asociacion di Hospitalidad y Turismo di Corsou Chata.
