E dumpnan ilegal rond di nos isla ta birando un problema latente cu ta menasa salubridad publico di nos comunidad. Den social media y agencia di noticia ta wordo cuestiona cu te hasta e compania Ecotech/Ecogas ta uzando dump ilegal cu bendicion di gobierno.
Den combersacion cu minister di Salud Publico, Alex Schwengle, Bon Dia Aruba a puntra kico ta haci contra e dumpnan ilegal. Te hasta un caso ta tumando luga den corte tocante un dump di asbest den cura di refineria. Minister Schwengle a laga sa na e matutino aki cu e dificultad ta cu na e momento aki e no por duna detayenan riba e maneho cu gobierno ta hibando riba e materia aki. E ta indica cu ta otro minister, esta su colega encarga cu maneho di Medio Ambiente (Mike De Meza) ta esun cu tin tur e detayenan relaciona cu e maneho di e dumpnan.
Plan nobo contra dump
Minister Schwengle ta informa cu actualmente nan ta trahando riba un plan nobo; pero e mester ta un plan nacional. Ya cu eventualmente gobierno ta bin cu un plan di maneho pa Parkietenbos so; pero e no ta bay ta suficiente. “Ta importante pa no tin un plan nacional integral, unda bo kier limita unda bo ta deposita bo sushinan.”
E no ta haya cu ta bon idea pa tin diferente luga pa benta sushi, ni cu e tereno ta di e hende mes of priva. Aunke e tereno ta wordo destina pa benta tipo di desperdicio manera hero, pero dado momento no ta bay ta hero so, sino otro tipo di desperdicio of sushi. E ta reconoce cu esaki por sosode pasobra no tin suficiente control.
Bon control
E ta sugeri cu mester limita dump na cierto luganan so y implementa un bon control. “Si ta bin un maneho nobo mes, un di aspectonan hopi importante semper ta, con bo ta controla bo maneho”. E ta haya cu nan por bin cu un ley of un ordenansa gubernamental preto riba blanco, pero importante ta con bo ta cumpli, maneha y controla nan.
