Minister di Exterior Hulandes, Stef Blok a expresa su preocupacion tocante derechonan humano na China y autonomia di Hong Kong durante combersacionnan diaranson cu su homologo Chines, Wang Yi.
Blok a bisa den un declaracion cu nan discusion a mustra cu ‘Hulanda y China kier traha hunto den un relacion mutuo serio’.
El a bisa cu arestonan na Hong Kong di periodista y legisladonan, e retraso di un aña pa eleccion legislativo, y e contencioso ley di siguridad nacional nobo di Beijing ‘tur ta desaroyonan extremadamente preocupante’. Lider di Hong Kong, Carrie Lam a pospone eleccion luna pasa, citando empeoramento di brote di coronavirus. Anteriormente diaranson, polis di Hong Kong a aresta 16 persona, incluyendo dos legislado di oposicion, bou cargo relaciona cu protestanan anti-gubernamental aña pasa.
E bishita di Wang na Hulanda ta parti di su tour di cinco nacion na Europa e siman aki, cu tambe ta inclui Francia, Alemania y Noruega. Diamars el a reuni cu su homologo Italiano, Luigi Di Maio, kende a bisa Wang cu China mester ‘preserva e grado halto di autonomia y e derechonan y libertadnan fundamental’ garantisa na ciudadanonan di Hong Kong.
E ley di siguridad nacional nobo di China pa Hong Kong ta mira pa hopi como e movida mas fuerte di Beijing pa kibra bareranan legal entre e teritorio semi-autonomo di Hong Kong y e sistema autoritario di Partido Comunista continental.
Blok tambe a toca riba otro problemanan di derechonan humano durante e combersacion na un paleis pafo di Den Haag, bisando cu e ‘specificamente a hala atencion riba e restriccion di libertad di religion y creencia na China, cu ta afecta particularmente Moslim, Cristian, y Budista Tibetano.
Legislado Hulandes, Martijn van Helvert, kende su partido CDA ta un miembro di e coalicion gobernante actual, a usa e bishita pa exigi accion mas fuerte contra Beijing. “Gobierno Hulandes mester ta cla cu no lo tin reanudacion di ‘business as usual’ cu Beijing tanten cu e persecucion di Moslim Uighur, Cristian y otro minoria religioso y etnico na China continua”, el a bisa na un conferencia di prensa cu dos activista Uighur.
Durante ultimo cuatro aña, gobierno Chines a detene alrededor di 1 miyon of mas miembro di minorianan etnico Turco na Xinjiang, teniendo nan den camponan di detencion y prison unda ta somete nan na disciplina ideologico, forsa pa denuncia na lenguahe y religion, y abusa fisicamente. China pa largo a sospecha cu e Uighur, kende ta principalmente Moslim, tin tendencia separatista pa motibo di nan cultura, lenguahe y religion distintivo.
Blok a bisa cu el a expresa su preocupacion tocante e lucha di Uighur cu Wang.
Van Helvert tambe a critica e ley di siguridad nacional, bisando cu e ta ‘criminalisa actividadnan politico legitimo y severamente ta manca libertadnan individual’, como tambe viola autonomia di Hong Kong.
Potret: CGTN.com
