E prizon KIA ta den bon estado, segun circunstancianan. Esaki minister di Husticia Hulandes Ard van der Steur ta conclui a base di su bishita e siman aki, sin tene cuenta cu e ultimo rapport di comision Europeo CPT concluyendo cu ta falta hopi ainda pa drecha.
Hasta e minister di Husticia di Aruba mes a declara cu e prizon ta den un estado deplorabel y cu mester di uno nobo. Pero durante e conferencia di prensa diamars riba e reunion di e cuater minister di Husticia di Reino, minister Arthur Dowers a cambia su opinion y ta bisa cu parti di prizon ta sirbi ainda y basicamente mester di tecnologia nobo pa KIA functiona miho.
E rapport di CPT, e comision di Union Europeo pa preveni tratamento inhumano y tortura di persona deteni, ta critica Aruba pa no a haci mucho pa drecha e situacion den su prizonnan desde 2007. E aña ey CPT a saca un rapport hopi negativo riba e situacion den e prizonnan.
Aruba ta haya container di prizon
Di parti di Hulanda no por spera un contribucion financiero pa un prizon nobo, pasobra esaki ta cay bou responsabilidad di minister di Husticia di Aruba, asina minister Van der Steur di Hulanda ta enfatisa. E minister Hulanda si ta dispuesto pa yuda Aruba (y tambe Corsou y St. Maarten) cu containernan di prizon di Boneiro. Esakinan lo resta ora Boneiro su prizon nobo a keda cla. Por spera e container nan otro aña, segun e minister, y esaki por yuda cu problema di capacidad den KIA tambe.
Finalmente e minister Van der Steur ta bisa cu na Hulanda presonan tambe ta keha cu nan no tin mucho di haci (un di e puntonan menciona den e rapport di CPT). E no ta algo cu ta sosode na Aruba so. Pues su impresion di e situacion na KIA ta keda uno ‘masha positivo’.
