Minister Hulandes di Salud Publico: Medidanan di coronavirus nobo ta posibel si situacion deteriora

(NLTimes) – Hulanda posiblemente lo mester impone medidanan pa coronavirus si e situacion deteriora, Minister Ernst Kuipers di Salud Publico, Bienestar y Deporte a bisa den un carta na parlamento riba dialuna.

Si esaki pasa, e strategia lo ta pa mantene sociedad, specificamente scol y institucionnan di muchanan habri pa lo mas cu ta posibel. “Pa awo, e variante dominante di coronavirus na Hulanda ta Omicron BA.2, cual ta haci hende bira menos malo. Nos ta mirando un disminucion den personanan cu ta test positivo, admision di pashent nobo na hospitalnan y ICU,” Kuipers a skirbi. “Sinembargo, RIVM ta indica cu nos mester tene na cuenta e posibilidad di un aumento atrobe. Por ehempel, e variantenan nobo BA.4 y BA.5 cu ta den aumento, y ta premira cu pronto nan lo bira e variante dominante na Hulanda.”

Kuipers a bisa cu no tin indicacion cla cu e variantenan nobo ta mas pathogenico cu BA.2. Sinembargo, el a adverti cu esaki por causa un presion aumenta riba e sistema di cuido di salud, specialmente si esaki causa un averahe di falta di empleado mas halto den e sector.

Un prioridad principal lo ta di mantene scolnan y institucionnan habri. Si gobierno kier tuma medidanan nobo pa preveni brotenan den futuro di coronavirus, cera educacion fisico ta na “final di e lista” y lo ser considera solamente si studiantenan, empleadonan y docentenan ta “den riesgo inmediato,” Kuipers a comenta.

Ministerio di Salud Publico ta tumando na cuenta cu un variante futuro di coronavirus por rekeri otro ronda di vacunacion. Hulanda lo mantene suficiente dosis di vacuna disponibel pa “ofrece henter e poblacion Hulandes un vacuna,” Kuipers a bisa. El a agrega si cu e vacunanan lo mester ser ahusta pa e variantenan nobo. “Den e caso aki, lo por tin un biaha mas un escasez di vacuna pa causa di capacidad di produccion di e vacunanan nobo aki den su prome fase di produccion.”

GGD actualmente por vacuna 300,000 persona pa siman, y por expande esaki na 500,000 vacuna pa siman den 3 siman, y 1.5 miyon pa siman despues di un periodo di 3 siman.

E Minister di salud a agrega cu mantene e sociedad habri ta rekeri “un strategia integra y di prevencion, cual ta nos responsabilidad comparti.” Varios aumento den infeccion hospitalisacion lo rekeri accion specifico den e sector di cuido di salud, mas vacuna, y posiblemente medidanan nobo cu lo afecta sociedad.