Minister Hooyboer-Winklaar: Ta desaproba carta di Director General di EPI dirigi na managernan di unidadnan

Minister Hooyboer-Winklaar por a tuma nota di un carta cu e director general di EPI a manda pa managernan di unidad di EPI a base di nan accion di protesta cu a tuma luga recientemente durante ora di trabou. 

E carta aki di e director general di EPI no a cay den bon tera cerca e managernan di unidad y tampoco cerca e sindicato SIMAR y esaki a conduci mesora na un reaccion di parti di e sindicato na nomber di nan miembronan. Minister Hooyboer Winklaar ta indica di no tabata na altura cu dicho carta a wordo manda pa e managernan di unidad y como tal e carta aki no ta conta cu su aprobacion. E mandatario a wordo notifica door di Dienst Publieke Scholen (DPS), bou di cual Colegio EPI ta resorta, cu e director general a manda un carta pa Hefe di DPS cu un conseho despues di e accion di e managernan di unidad.

 E procedura normal ta cu DPS na su turno mester haci e investigacion y conseha Minister como organo huridico den e pasonan cu mester wordo tuma den un situacion asina. Minister Hooyboer-Winklaar ta indica cu e no ta e competencia di director general di EPI pa manda e dicho carta y sigur no prome cu Minister como organo huridico a wordo notifica y cu a tuma un decision. Fuera di esey Minister Hooyboer ta bisa di a atende e director general tambe riba e tono y e contenido di e carta mirando cu esaki no por conta cu sosten di e mandatario ni tampoco di DPS.

Principalmente pa loke ta e peticion di e director general na e managernan di unidad pa no tene accion y pa distancia nan mes di actividad similar den futuro. Minister Hooyboer-Winklaar ta indica cu esaki no por. Minister ta enfatisa si cu tur partido tin nan derecho y obligacion pero ta convenci cu na mesa ta unda cu ta yega na un solucion. E oferta na e managernan di unidad ta riba mesa di September 2015 unda cu a base di esaki tabata tin hopi corespondencia entre e partidonan. Mientras tanto un carta di e mandatario a bay diabierna ultimo pa SIMAR unda cu Minister ta informa e sindicato di ta tuma distancia y cu ta desaproba e carta di e director general y cu DPS ta esun encarga pa conseha Minister riba e situacion aki.