Diaranson mainta durante su discurso na e congreso di dia internacional di hende muhe na Renaissance, Minister Michelle Hooyboer-Winklaar a anuncia di sorpresa cu e no ta bay participa den e siguiente eleccion na September.
Esaki tabata un parti chikito di su discurso na e congreso di dia internacional di hende muhe. E enfasis di e mandatario su presentacion den e evento aki tabata riba hende muhe den politica en general. “Pero mi a uza e oportunidad si pa anuncia esaki. Un decision cu mi a tuma. Pa mi dos termino como un minister tabata suficiente. Pa locual awo mi ta bay na e otro desafionan, kico eseynan lo ta , na e momento aki mi no sa. Mi no tin ningun planes te cu awo,” e ta bisa.
Semper tin trabou
Minister Winklaar ta bisa cu ainda e no a stop di traha, kiermen ainda falta basta tempo segun e mandatario pa cumpli cu cierto cosnan. “Obviamente cualkier hende cu semper bisa ‘ami a cumpli cu tur cos!’ no lo ta sincero. Pasobra semper tin trabou pa haci y mi ta satisfecho cu ami hunto cu mi team, por a yega na introduci cambionan den nos sistema di enseñansa. ” E ta sigui bisa cu: “Nos a bini cu cambionan profundo pa por kita hopi biaha e desigualdad cu ta existi, tambe diferente areanan di infrastructura, e prestacion di nos studiantenan y tambe loke nos a inverti pa e maestronan.”
Famia ta prome
E mandatario ta enfatisa cu e ta keda sostene partido AVP anto ta segura cu ningun descontento tin di haber cu e decision akinan. “Simplemente mi no lo ta presente riba e lista.” Manera cu el a splica den su discurso den e congreso, e mandatario a subraya cu: “E motibonan cu mas pami ta importante ta e factor di famia. Obviamente mi ta kere cu no ta un secreto cu e peso di tin un funcion asina ki combina cu famia pa asina hopi aña, e ta dificil. P’esey ami aworakinan a tuma e decision aki conhuntamente cu mi famia.”
Hende muhe den politica
Minister Winklaar a dedica ocho aña di su bida den politica anto a pesar cu e ta tumando su distancia di esaki, e ta bisa cu e juist kier bira un ehempel pa otronan. “E no ta bay rond di un hende, e ta bay rond di un grupo di hende muhenan cu juist nos kier eleva mas hende muhe pa por tin e posibilidad aki. E hende muhe mester habri caminda pa otronan tambe por siguiele.” Minister Winklaar ta bisa cu nos mester mas hende muhe den politica na Aruba. Den eleccion di 2013, a pesar cu tabata tin candidatonan riba listanan combina, tur lista tabata tin 26% cu tabata tin hende femenino. Conhuntamente, nan a bay cu solamente 22% di tur e votonan, segun Minister Winklaar a splica den su discurso. “Obviamente si bo hisa e cantidad di politiconan femenino cu ta riba un lista, pero tambe e votonan cu ta bayendo, e chens ta mas grandi cu nos ta bay haya un presencia di mas hende muhe,” e ta bisa. E minister ta sigui bisa cu no ta simplemente pasobra kier wak mas hende muhe den e mundo aki, pero mas pa e balans cu hende muhe y hende homber por trece.
“Den e combinacion eynan nos por wak cu semper tin exitonan mas profundo. Nos mester crea si e espacio den e clima politico pa hende muhenan cu ta aspira pa drenta no mester actua manera hende homber.” E ta bisa cu esey ta e tendencia hopi biaha no solamente den politica, pero den sector priva. E ta pone como ehempel cu ora bo yega na cierto nivel, abo como ser femenino mester cuminsa bira mas ‘tof’ y practicamente actua of adapta aspectonan di liderazgo mescos cu un hende homber. “Esaki ta cosnan cu no ta necesario”
