Ministro Plenipotenciario di Aruba, esta Guillfred Besaril, a haya un invitacion pa representa Aruba durante un audiencia priva cu Papa Francisco. E invitacion ta bin di e organisacion turistico ‘Confederación de Organizaciones Turísticas de América Latina’ (COTAL).
E audiencia aki ta tuma luga awe dia 6 di december na e ciudad di Vaticano, Roma. Minister Besaril tin algun dia na ta na Roma caba, caminda el a atende varios reunion cu mandatarionan di dicho pais y dignatarionan di e ciudad di Vaticano. Minister Besaril lo clausura su bishita cu un audiencia priva cu su Santidad Papa Francisco.
Minister Besaril ta forma parti de e delegacion di COTAL, presidi pa Don Armando Bojorquez Patron. E delegacion ta consisti di mas di 45 empresarionan importante den e mundo turistico Latino Americano, kendenan lo atende tambe un audiencia general cu Papa na e ciudad di Vaticano, Roma. Banda di esaki lo tin varios encuentro cu empresarionan den e sector turistico Italiano. Tur esaki den cuadro di e 60 aniversario di COTAL.
Recientemente minister Besaril a habri e serie di reunionnan general entre empresarionan Italiano y Latino Americano. Durante e diferente encuentronan Minister Besaril a percura pa informa esunnan presente di tur locual Aruba tin di brinda como destinacion turistico.
Banda di ta un honor grandisimo pa Aruba di por a ricibi e invitacion pa e audiencia cerca Papa Francisco, e bishita di minister Besaril na Vaticano ta un momento historico pa nos isla. Durante e bishita aki e Santo Papa lo bendiciona e bandera di Aruba, cual bandera na su turno, minister Besaril lo entrega na Minister Presidente Wever-Croes na su yegada bek na Aruba. E bandera bendiciona aki lo tin su luga permanente den bestuurskantoor di Aruba.
Di parti gobierno di Aruba Minister Besaril lo regala Papa Francisco un cuadra imprimi riba canvas di nos precioso Kapel di Alto Vista, fotografia pa e hoben fotografo Ayrton Tromp.
Aruba recientemente a ricibi e grato noticia di a wordo honra cu un posicion den hunta di directiva di e COTAL. Pa prome bes Aruba lo tin representacion como pais den e organisacion turistico Latino Americano, despues cu pa aña nan Aruba a resorta bou di e representacion di Hulanda den dicho organisacion. Esaki ta un logro grandi cu lo habri hopi porta y oportunidadnan den sector turistico pa Aruba. Victoria ‘Vicky’ Eugenia Pérez, presidente di Asociación Turística del Caribe lo ta Aruba su representante den COTAL.
