Durante su prome conferencia di prensa pa e aña aki, minister di Labor, Energia y Integracion Glenbert Croes a anuncia e resultadonan di e biahe cu el a wordo haci pa Ecuador.
Manera a wordo splica aña pasa, Minister Croes a bay na Ecuador y a reuni cu e minister den e tempo ey cu e proposito di baha prijs di awa y coriente buscando posibilidad y oportunidad pa acuerdonan cu por logra yuda beneficia e pueblo cu e reduccion di prijs di awa y coriente.
Di esaki, el a comenta cu a ricibi conseho en bista cu Ecuador su companianan nacional di petroleo ‘Petroecuador’ ta suministrando caba Heavy Fuel Oil (HFO) pa Aruba for di varios aña pasa pero e acuerdo ey ta pasa via dos intermediario “y ora cu bo por elimina intermediarionan pa Refineria di Aruba y FMSA cumpra direct na Petroecuador sin intermediario, ya eynan caba bo ta bay logra un costo di Heavy Fuel Oil hopi mas barata cu loke actualmente ta wordo paga pa Aruba y pa e por wordo pasa pa WEB pa por baha e prijsnan,” Minister Croes a sigura.
Den WEB su structura di costo pa produccion di awa y coriente, e HFO ta un componente grandi manera el a sigura, ora cu lo logra un miho prijs, un bon descuento y no loke pueblo ta pagando na e momentonan aki, FMSA ta bay yuda door di logra un miho acuerdo, esey ta e meta.
Minister Croes tambe ta sigura cu e ta comparti e preocupacion cu tin cu entre otro, costo di bida na Aruba ta halto “baha prijs di awa y coriente ta un di e componentenan cu ta fundamental pa nos por logra alivia e costo di bida pa henter nos comunidad.”
Despues di e prome bishita unda e minister encarga cu e cartera aki na Ecuador a wordo cambia, embahada di Hulanda na Lima, Peru hunto cu consulado general di Hulanda na Ecuador a haci e maximo esfuerso pa por a continua cu e posibilidad di haya un di dos reunion.
E di dos reunion a tuma luga unda cu Minister Croes hunto cu Edison Briesen, presidente di hunta di comisario di Refineria di Aruba y conseho di gobierno riba e tema aki a bay Ecuador pa reuni cu e minister nobo di Energia y Mina, Fernando Santos Alvite, hunto cu e vice-minister di hidrocarburo, Ruben Dario Espin Zapata, na unda nan a wordo acompaña pa e consul general na Ecuador Dr. Diego Alveira Guzman y Minister Croes a gradici e apoyo diplomatico di Hulanda cu ta instrumental pa habri e portanan.
Durante e reunion a sali dilanti e boluntad di gobierno di Ecuador y su minister di coopera cu e solicitud di Aruba pa nan por logra un relacion directo entre e companianan nacional cu ta Refineria di Aruba y FMSA pa por cumpra e combustibel cu WEB tin mester sin cu mester pasa via intermediario, “nan a expresa cu esey ta e intencion di nan, nan lo desea pa companianan nacional of di Estado no tin modo di usa intermediario, unda pueblo di Aruba por spaar masha hopi placa,” Minister Croes a declara.
Door di Refineria di Aruba y FMSA ta pertenece na Gobierno di Aruba, e minister a urgi pa Petroecuador laga e companianan aki participa den un tender como cualkier otro compania priva cu negociacionnan directo, buscando terminonan husto tanto pa Ecuador como pa Aruba.
Igualmente el a informa cu nan ta buscando cooperacion riba e terminal di tankinan na unda nan tambe a acerca Flotas Petroleras del Ecuador (Flopec), ken ta e compania cu ta transporta tur producto di crudo di Ecuador y den esaki tambe nan a acerca Petroecuador den e proceso pa reactiva loke ta e “good assets” di refineria, di un tecnologia limpi y no cu HFO mientras cu lo wordo haci e transicion di fosil fuel unda el a sigura cu ekiponan bieu di refineria lo wordo reemplasa.
El a splica cu nan ta bin trahando riba Eagle LNG su facilidadnan, pa lo cual el a sigura cu esey ta bayendo “biento en popa” y p’esey nan ta haci e acercamento cu Ecuador pa reactiva e patio di tanki y e terminal di refineria y tambe FMSA ta invertiendo den mehora su infrastructura y asina ey por offload gasolin, diesel, jetfuel y HFO.
“Bao di ningun circunstancia nos ta bay permiti pone na riesgo e siguridad di energy supplies pa nos pais, pa nos economia, RDA a traves di su board, a traves di sugerencia y tambe riba recomendacion di Gobierno di Aruba nos a urgi pa todo por todo wordo haci pa siguridad y integridad di infrastructura energetico na RDA,” Minister Croes a sigura.
Di mesun manera, el a trece dilanti cu ohala tur e placa cu a wordo poni pa Citgo por a wordo inverti mientras cu tabatin placa destina pa inversion di infrastructura di e refineria: “ora cu Citgo a bin, nan a pone placa grandi disponibel riba Refineria di Aruba pero el a wordo chica, malgasta, e no a wordo inverti den infrastructura di e refineria y ora cu nan a sali y nan a bay, e situacion a keda desafiante y dificil, pero nos lo sobrevivi”.
El a anuncia tambe cu na luna di februari Utilities N.V y Refineria di Aruba N.V nan ta bay Hulanda pa por firma un Memorandum of Understanding (MoU) pa e desaroyo di Aruba Hydrogen Valley cu segun el a anuncia, ta bay ta e prome den Caribe pa asina ey tambe designa e zona di refineria cu lo wordo destina pa proyectonan energetico y e zona di refineria lo bira e parke industrial di industria di energia na Aruba.
