Diamars atardi a tuma luga conferencia di prensa di Minister di Labor, Energia y Integracion, Sr. Glenbert Croes, unda cu el a toca e asunto di informacion cu un medio di comunicacion a publica dialuna insinuando cu Minister Croes tabatin un persona di status ilegal trahando na su cas.

Minister Croes a cuminsa e rueda di prensa enfatisando cu e noticia publica “ta totalmente falso!” El a remarca cu e no tin niun persona di status ilegal trahando na su cas y el a hasta indica cu e señora cu traha na su cas, un biaha pa siman segun el a señala, ta casa cu un ciudadano Arubiano di nacionalidad Hulandes y ta legal na Aruba.

“Mi ta kere nan ta custumbra cu e casonan di tempo di Ministernan di AVP cu a wordo implica den corupcion cu a haya nan cu ilegalnan na nan cas y tambe haya nan den problema di traficacion di hende”, el a bisa.

El a sigui splica cu e noticia publica ta indignante, no ta solamente pasobra e noticia ta falso, pero pasobra e ta haya cu e medio di comunicacion en cuestion ta hungando cu e enfermedad, e dolor di un persona cu e conoce di tempo cu e persona a traha pa su señora mama.

“Ami ta considera usa su situacion, unda cu na e momentonan aki loke e mester di dje ta asistencia medico, ta pa rasonnan politico. Esey ta e unico motibo dicon nan ta usa e caso aki, pa rasonnan politico. Ta totalmente inaceptabel”, el a señala.

Segun e Minister a sigui menciona, como Minister di Labor, Energia y Integracion, e mester para pa tur yiu di tera y como Minister di Integracion pa tur inmigrante, “cu nan ta legal of ilegal nan tin derechonan humano fundamental cu mester wordo respeta”.

El a indica cu e caso en cuestion, ta solamente un caso cu a sali na cla, pero el a bisa tin hopi mas caso cu prensa no ta na altura di dje. El a enfatisa cu locual ta mas importante p’e den e caso aki cu nan a trece pa dilanti ta e asistencia humano, medico cu e señora y su famia tin mester di dje.

Minister Croes a splica cu e tabatin contacto cu e señora, su esposa tambe tabatin contacto cu e señora. Y el a reitera tambe cu como minister, no solamente como persona, e mester busca tur manera pa purba yuda e señora aki den su situacion. Segun informacion, e permiso di e señora den cuestion a wordo nenga y e ta ilegal actualmente na Aruba.

“Hopi biaha ora ta papia di stranhero ta papia di un forma degradante, cu resentimento, cu xenophobia. Y mi ta gusta bisa nos no mag di lubida cu ora nos, cada un cu ta biba ariba Aruba subi un avion pa bay unda cu ta, nos tambe ta bira stranhero y mester atende e temanan aki cu hopi sensibilidad”, Minister Croes a agrega.

El a enfatisa cu como Minister y como persona e ta condena e hecho cu ta mal usa e situacion di e caso aki pa rasonnan politico, pero el a indica cu e caso no a keda te eynan.

Segun e Minister a informa, e medio di comunicacion en cuestion ta persiguiendo su señora esposa, su yiunan y ta hasta filma nan ora cu ta busca nan na scol y no ta tapa nan cara violando, segun Minister Croes, nan derecho na privacidad. “Ami ta den politica; mi señora, mi yiunan, mi famia no ta den politica. Mi ta haya e violacion di privacidad cu e instigacion contra mi famia totalmente condenabel y inaceptabel”, el a agrega.

El a señala cu e medio di comunicacion aki tin un furia contra su persona pasobra e ta toca algun interesnan importante. “Obviamente mi ta realisa cu nan mester ta interesnan hopi grandi, pero mi kier bisa cu ta facil pa mi baha nan for di lomba, hopi facil. Pero esey kiermen cu lo mi mester baha cabes pa nan doño y esey no ta bay pasa. Nan doño no ta mi doño”, el a bisa.

Segun e Minister a indica tambe, e ta combatiendo cartelnan di corupcion cu ta traficando cu hende, pisca, oro y droga. “Un cos mi ta priminti boso, mi lo caba cu nan. Pero tambe mi lo caba cu nan tentaculonan, nan contactonan, nan complicenan den cierto departamentonan”, el a menciona.

El a enfatisa cu den su pensamento mester trata asuntonan cu ta regarda situacionnan di necesidad y tambe penoso, dificil cu dignidad humano, no solamente den e caso aki pero den hopi otro caso.

“Tin hopi cos unda cu nos mester reconoce cu tin problema, tin tardansa unda cu mester tin eficiencia y efectividad den trata asuntonan, sea ta pa permisologia, pa tur sorto di permisologia, no solamente cu permisonan cu ta pasa via DPL of Dimas, pero tambe na otro departamentonan”, el a agrega.

Minister Croes a subraya cu mester trata interesnan di comunidad cu seriedad, cu deber di kier cumpli, cu deber di duna cara, brinda servicio y nos sconde tras di un bentana y no sconde tras di un e-mail. “Nos mester habri nos portanan pa pueblo back, pa duna pueblo e asistencia cu e merece. Esey ta e gobierno humano cu nos kier ta parti di dje, cu nos kier laga atras, e sesibilidad humano pa trata tur caso”, el a expresa.

Por ultimo el a bisa, el a priminti, cu e porta di unda informacion aki a sali na cla, cu a yega den man di un medio di comunicacion ta bay keda habri. “E porta di unda e informacion ey a sali ta bay keda habri pasobra obviamente, tin mas informacion ta bay sigui sali simplemente pa tene tur hende honesto, ora cu deshonestamente nan kier purba kibra hende djis pa rasonnan politico”.