Ayera gobierno a reuni cu tur e stakeholders riba tereno social kende a presenta un plan di emergencia pa gobierno. Esaki ta un plan di emergencia segun gobierno pa evita cu locual a pasa cu Roshandroh y Eugene no pasa nunca mas riba nos isla. E plan di emergencia naturalmente tin gastonan envolvi, y con lo cubri e gastonan aki tambe a wordo dialoga riba dje ayera.
Ayera mainta departamentonan di gobierno y organisacionnan di e sector social a presenta e plan di emergencia. Un plan integral/social pa bay combati e ‘crisis social’ cu nos tin na Aruba segun minister di Asuntonan Social y Labor Glenbert Croes a declara na prensa ayera despues di su reunion cu gobernador. E plan ta pa coordina tur instancianan den sincronisacion cu gobierno pa cuminsa resolve e presion social di cual nos pais ta aden segun minister Croes. “Nos a aproba awe di forma integral e implementacion di e plan di emergencia aki cu a wordo proponi na nos. Cu un di e puntonan central ta pa nos bin cu un meldcode central cu ya caba tambe coleganan di fraccion di Mep a cuminsa tuma e iniciativa riba dje,” e mandatario a bisa. Esaki ta pa señala y responde na tempo anto interveni riba cualkier forma di abuso contra mucha, hende muhe, nos grandinan y cualkier abuso cu wordo mira.
Minister Croes: ‘Bisa cos mane cu e ta’
E mandatario encarga cu asuntonan social a bisa cu el a pidi tur departamento di gobierno y tur instancia pa ‘basha abao!’ El a bisa nan pa bisa cos manera cu e ta segun nan opinion y papia berdad pasobra esaki ta e momento pa bisa cos manera cu e ta pa por cuminsa actua. “Ta facil pa tira culpa como gobierno nobo riba sectornan social. Kico cu por a pasa den pasado, laga nos realisa cu solamente si nos actua hunto nos por logra resultadonan. No tin tempo pa tira culpa riba ningun hende. Nos mester logra resultadonan pa nos pueblo,” minister Croes a expresa. Den cuadro cu e decisionnan cu nan a tuma, e instancia Bureau Sostenemi ta bay keda hunga e rol central pa ta e ‘central meldpunt’, sosteni pa Asuntonan Social. Por medio di e falta di personal por ehempel di Bureau Sostenemi, nan ta atende locual ta ‘red flags’ segun e mandatario, urgencianan di lo mas grandi cu por. “Pero e realidad ta cu den cuestion di minuut algo cu no tabata red flag a bira esey. Si nos kier atende cu problemanan di abuso, nos mester ta cla pa ricibi y responde na tur keho.” Siman pasa nos a publica un otro entrevista cu mayor conoci pa protesta pa derechonan di mucha, Reginald Danies, un poco riba e status di su caso y pa kico casonan ta pega na instancianan. El a menciona cu un meldcode/meldpunt no lo bay haci nada si no bini cambio den ley. Danies: “Nan no tin niun ley cu nos ta traha cu Bureau Sostenemi of cu ken, nan ta tende locual Voogdijraad bisa y niun hende mas. P’esey ami ta bisa cu meldpunt no ta bay yuda cu nada, e problema ta mas leu cu loke hopi ta pensa.” Bon Dia lo sigui e desaroyonan aki pa wak con esaki ta bay sigui cana cu e diferente instancianan y ministerionan.
Masterplan di Reino
Minister Croes a bisa cu den e curason di esencia di recomendacionnan, tabata tin dies decision fundamental cu nan mester a tuma di cual nan a tuma caba. A notifica directora di Asuntonan Social cu gobierno a haci un compromiso pa implementa e plan aki. “Tambe nos a compromete como gobierno cu den forma interministerial – door cu ta diferente minister envolvi – coordina e trabaonan cu otro,” el a bisa. Ayera de conseho di minister, a base di e congreso di Reino cu tabata tin organisa por medio di Fundacion pa Hende Muhe den Dificultad contra violencia domestico, a wordo proponi pa bin cu un masterplan di Reino. Esaki segun minister Croes lo nifica cu den cuadro di cooperacion y trabao di paisnan di Reino, no lo tin solamente e obligacion di coopera cu otro pero tambe controla otro den implementacion di leynan/politica pa actua contra e fenomeno grave di violencia den nos comunidad.
Inversion social
Mester bay busca aprobacion na conseho di minister y hasta mester entrada pa extra trahado social cual tin un demanda grandi pa esey. Segun minister Croes ya caba a pone un fecha pa e fin di luna aki nan tin e prome reportahe y tambe presupuesto cu ta bin cu ne pa loke ta trata e plan di accion. Tambe pa e resto di sector social pa fin di januari unda cu tambe lo mester tin e presupuesto (kostenplaatje) y bista financiero di kico ta bay ta e inversion social. “Nos ta realisa cu pa awor bay dilanti, compromiso di e gobierno aki y futuro gobiernonan ta bay ta pa salba e futuro social di nos pueblo. P’esey nos a decreta cu Aruba ta den un crisis social nacional. Y cu nos mester bin cu e plan di emergencia aki cu nos a aproba. E tarea ta pa tur minister den un forma interministerial segura cu tur e plannan ta wordo ehecuta,” minister Croes a bisa.
