Den ultimo simannan, parlamentario di fraccion MAS, Marisol Lopez Tromp a haci publico un serie di pregunta dirigi na minister di Energia, Labor y Integracion, Glenbert Croes, tocante algun aspecto di su maneho. Mediante un comunicado di prensa, Croes a contesta dos di e preguntanan aki.

E prome pregunta di Lopez-Tromp ta cuestiona si Minister Croes a otorga un permiso specifico cu no ta segun conseho di DIMAS.

Segun e comunicado, Croes a contesta Lopez-Tromp indicando cu e persona en cuestion tabatin 5 permiso di trabao y 2 di estadia bao di personalia falso, y tur 7 permiso a wordo otorga door di DIMAS. Esaki tabata prome cu Croes a asumi e cartera di Integracion.

Croes a sigui splica cu e di 8 permiso a wordo nenga pendiente di un investigacion na Censo, mirando cu e persona aki a declara voluntariamente di tin un identidad falso desde cu e tabata menor di edad. Na November 2022, e persona aki a cuminsa un caso na corte pa pidi medida temporal y esaki ta momento cu Croes a haya conocimento di e caso aki.

Pa permiso number 9, Croes a indica cu despues di a tuma conseho di AVI-commissie, basa riba e veredicto di hues di dia 8 di Februari 2023 (Lar. nr. AUA202204192), a otorga dicho permiso. Tambe Croes a splica cu DIMAS a manda conseho pa su persona den e caso aki, cual tabata pa revoca e permisonan anterior (1-7), cu DIMAS mes a otorga como departamento y pa warda e resultado di diferente investigacion prome cu otorga permiso 9 y 10. DIMAS no a conseha pa no otorga ningun permiso. Peticion pa cu revocacion di permisonan anterior ta den evaluacion, y pa loke ta permiso 9 y 10 lo keda pendiente pa veredicto den e caso aki pa tuma un decision final.

Ademas, Lopez Tromp a pidi un reunion publico den Parlamento cu Croes relaciona cu e caso di Kathy Paskel, director di DIMAS.

Croes a indica cu den e ultimo dos aña, su persona tabata den diferente reunion publico den Staten. Ultimo biaha tabata dia 14 di December 2023, na unda el a duna splicacion amplio pa cu su maneho di integracion, como tambe tocante e relacion cu sra Ruiz-Paskel. El a indica di a duna splicacion amplio di e casonan den corte y cu lo actua conforme e veredictonan di hues.

Croes ademas a indica cu el a atende varios reunion di Parlamento unda a presenta y elabora riba su maneho, y pues ta considera e critica di Lopez Tromp como uno sin base.