Ayera den un conferencia di prensa, minister di Labor, Integracion y Energia, Glenbert Croes a trece dilanti e topico di DIMAS. Den ultimo dianan, e tema aki a bira un polemica pa via di e retiro di su director, cu segun e mesun mandatario a indica, tabata pa motibo di desconfiansa.

Croes a bisa cu segun rapportnan for di 2008 a constata un serie di problema den e Departamento di Integracion, Maneho y Admision di Stranhero, DIMAS, unda cu 9 di maart ultimo el a institui un management team, y a raiz di cierto cambio cu el a haci, el a duna di conoce e nombernan di esnan cu ta forma parti di ekipo aki.

Croes a señala cu el a haci un cambio den e decreto cu a emiti algun dia atras, na unda cu esnan cu ta bay ta encarga cu maneho di DIMAS ta Liri Frias como presidente, Edgar Arends como beleid adviseur, Gendrick Baar, y Jenifer Tromp.

Alabes, el a papia tocante e “acusacion falso” cu Kathy Paskel, director di e departamento, a haci contra Croes tocante creacion di un management team. “Esey no kiermen cu pasobra ta bay bin un decreto nobo pa haci cambionan, cu bo tin dos copia di un decreto, bo por acusa e minister di ta anti-data of ta falsifica decreto pa institui un comision”.

Segun el a menciona, door cu ta bin haciendo cierto coreccion – y na comienso tabatin hopi problema door cu e LIM no a pasa – tabatin un discusion di ken por firma y bao ki titulo nan por firma documentonan oficial pa e departamento. Ta p’esey cu e nomber di e management team a ser cambia dos biaha mediante decreto. Paskel mes tabata forma parti di e management team inicialmente, segun Croes a menciona.

“Pa despues e ta bin acusa mi cu tin dos MB cu ta mescos, di diferente fecha, unda un ta bisa Directie Team y otro ta bisa Stuurgroep. Pa bo por acusa mi di esey, cu akinan mi ta anti-data of mi ta falsificando decreto, pa mi ta algo intragabel, inaceptabel y cu ta basicamente viola e confiansa entre e minister y su director gravemente; pa cual mi a institui e Management Team cu ta bay ta encarga cu e ley di DIMAS”, Croes a manifesta.

El a informa cu for di 2008 tin casi un miyon florin cu a bay den rapportnan traha riba e problemanan cu tin den departamento aki pa loke ta trata e operacion, na unda el a sigura cu e tin pleno confiansa den tur e trahadonan di DIMAS. Tambe el a bisa cu el a retira director Paskel, ya cu den un ultimo rapport a indica cu Paskel tin tur responsabilidad di e problemanan señala na DIMAS.

Croes ta puntra su mes ki motibo Paskel tin pa frustra un subcommissie di ICT pa haci un auditoria den DIMAS, pa check e motor di DIMAS cu ta e ICT pa genera y procesa permisonan – unda el a referi na aña 2016 y 2017 a yega na e software riba cual a gasta 2.3 miyon florin.

Croes tambe a trece dilanti diferente companianan di ICT cu tabata bao encargo di Paskel, segun el a sigura, for di algun tempo caba, declarando cu e sistema aki ta e motor di e departamento, y a agrega cu Paskel a bringa pa un ICT consultant cu a wordo contrata for di 2016, na ken a paga casi 480 mil florin.

Croes a afirma cu como minister encarga cu DIMAS, e ta bay laga haci un auditoria forensico di tur e señalamento aki, pa loke ta trata e parti di ICT, caminda tambe ta bay investiga con permisonan ta wordo regla den 24ora.

“Bo sa kico ta pio? Despues di 7.1 miyon florin gasta, e sistema riba e route map no ta ni 50% cla”, el a sigura.

Den e ronda di preguntanan di periodistanan presente den e conferencia di prensa, a bin dilanti cu den un comunicado manda na diferente medionan di comunicacion siman pasa, tabata indica cu director Paskel a entrega un denuncia. E pregunta ta si minister Croes ta na altura cu tin mas departamento cu a entrega denuncia contra e maneho? Pa cu esaki, minister Croes a comenta cu e no ta na altura di esey.

Ademas el a informa e reportero di 24ora, kende a haci e pregunta, cu el a uni na e accion cu minister Rocco Tjon a cuminsa contra e medio di comunicacion aki, unda nan no ta contesta e preguntanan cu reporteronan di e medio aki ta haci.

“A mi ta uni mi mes contra e accion aki contra 24ora. Boso a lastra mi señora, boso a lastra mi mama, boso a persigui mi yiunan y filma nan”, Croes a declara.

Den mesun rosea el a mustra un potret di e ekipo di negociacion cu a bay negocia cu CITGO na Caracas, Venezuela, unda cu segun el a indica, e periodistanan di 24ora como Patrick Paskel y Speed Andrade tabata den comision ey.

Asina mes, el a acusa un periodista di “traficado cu pisca” mientras cu “tin un narcotraficante pa zuid ta dun’e pisca pa e bende akinan y e ora e mester pag’e back – bo sa kico esey ta? Esey ta Narcolavado”.

Ta importante pa haya sa cu si tin conocemento riba e “supuesto” actividad ilegal pa cual minister ta acusa e persona en cuestion, ta bin dilanti e pregunta: Con autoridadnan por laga e persona busca pisca di narcotrafico? Si tabatin conocemento, pakico autoridad no a actua? Y pakico a permiti? Sin pruebanan no por trece acusacion serio di e tipo aki.